So‘rovnoma: O‘zbekistonda narxlar o‘sishining asosiy sababi xom ashyo qiymati oshishida deb ko‘rsatildi

Markaziy bank ikkinchi kvartalda o‘tkazgan so‘rovnomada 437 ta tashkilot va korxona, jumladan “O‘zbekneftgaz”, “O‘zbekenergo”, “O‘zqurilishmateriallari”, “O‘zkimyosanoat”, “O‘zsharobsanoat”, “O‘zdonmahsulot”, “O‘zavtosanoat” va boshqalar tarkibiga kiruvchi kompaniyalar ishtirok etdi, deb yozadi Spot.

So‘rovnoma davomida ishtirokchilarning 38 foizi ikkinchi kvartalda o‘z mahsulotlari narxlarini oshirganligini ma’lum qildi. Ulardan 82 foizi narxlarini 15 foiz chegarasida, jumladan, 31 foizi 1—5 foiz, 39 foiz ishtirokchilar 6—10 foiz va 12 foiz so‘rovnoma ishtirokchilari 11—15 foiz chegarasida oshirgan.

Iqtisodiyot sohasida tog‘-kon sanoatining 60 foiz korxona va tashkilotlari, kimyo sanoatining 47 foiz, qurilish materiallari sanoatining 39 foiz, oziq-ovqat sanoatining 40 foiz va yengil sanoatning 32 foiz korxona va tashkilotlari o‘z mahsulotlari qiymatlarini oshirgan.

Shuningdek, qurilish ishlari sohasidagi 77 foiz, transport xizmatlari sohasidagi 48 foiz va tibbiy xizmatlar sohasidagi 22 foiz korxona va tashkilotlar o‘z mahsulotlari narxlari oshganligini qayd etgan.

Bunda so‘rovnoma qatnashchilarining 65 foizi narxlar oshishining asosiy omili sifatida xom ashyo qiymatlari o‘sishini qayd etgan. Jumladan, ishtirokchilarning 22 foizi xom ashyo narxlari oshishi 1—5 foiz, 39 foizi 6—10 foiz chegarasida, 16 foizi 11—15 foiz chegarasida ekanligini ta’kidlagan.