Farg‘onada mutasaddi rahbarlar e’tiborsizligi tufayli 17 ta deputatlik so‘rovi javobsiz qoldi
Xalq deputatlari Farg‘ona viloyat, shahar va tuman Kengashlariga O‘zbekiston “Milliy tiklanish” demokratik partiyasidan saylangan deputatlar o‘z vakolatidan to‘laqonli va unumli foydalanishga intilib, mavjud masala va muammolarni hal etishga alohida e’tibor qaratmoqda, deb xabar beradi partiya matbuot xizmati.
2018-yil birinchi choragida mahalliy Kengashlardagi partiya guruhi a’zolari tomonidan qonun va hukumat qarorlarining joylardagi ijrosi hamda fuqarolardan kelib tushgan murojaatlar asosida 134 ta deputatlik so‘rovi yuborildi. Mazkur so‘rovlarning aksariyati xalq deputatlari Farg‘ona, Qo‘qon, Marg‘ilon shahar, Quva, Dang‘ara, Beshariq tuman Kengashlaridagi partiya guruhi a’zolari tomonidan amalga oshirildi. Bu borada xalq deputatlari Bag‘dod, Oltiariq, Furqat, So‘x va Qo‘shtepa tuman Kengashlaridagi ayrim deputatlar o‘z vakolatlaridan unumli foydalana olmadi.
17 ta deputatlik so‘roviga ayrim korxona, tashkilot va muassasalar mutasaddilarining mas’uliyatsizligi natijasida javob qaytarilmadi.
Masalan, xalq deputatlari viloyat Kengashi deputati, Muhammadali Yusupovning 2018-yil 22-yanvar kuni Furqat tumani Agrobank boshlig‘i nomiga yo‘llagan so‘roviga hanuz javob olingani yo‘q.
Mazkur so‘rovda Furqat tumani Eshon qishlog‘ida yashovchi Behzod Subxonovga tadbirkorlik faoliyatini kengaytirish maqsadida kredit ajratib berish masalasi ko‘tarilgan. Darvoqe, so‘rov matnida deputat so‘roviga qancha muddatda javob qaytarishi lozimligi va mazkur holatda qonun buzilishiga yo‘l qo‘yilishi, javobgarlik belgilanganligi eslatma tariqasida ko‘rsatib o‘tilgan.
Bundan tashqari, xalq deputatlari Uchko‘prik tuman Kengashidagi O‘zMTDP guruhi a’zosi Abdusamatova Xojiraxonning 2018-yil 12-martda “Vodiygazta’minot” unitar korxonasi tuman filiali boshlig‘iga yuborgan so‘roviga ham hech qanday javob berilmadi. Mazkur deputatlik so‘rovida tumandagi Sariqo‘rg‘on qishlog‘idagi shoshilinch tez tibbiy yordam shoxobchasi binosini gaz bilan ta’minlashda amaliy yordam ko‘rsatish so‘ralgan. Tuman markazidan uzoqligi tufayli aholini dolzarb muammo yuzasidan qayta-qayta yo‘llagan so‘rovi bee’tibor qoldirildi.
