“Mir Arab” oliy madrasasining ochilish marosimi bo‘lib o‘tdi

6-sentabr kuni “Mir Arab” oliy madrasasining tantanali ochilish marosimi bo‘lib o‘tdi. Bu haqda O‘zbekiston musulmonlari idorasi ma’lum qildi.

Tadbirda Toshkentdagi Islom sivilizatsiya markazi direktori Sh. Minovarov, Vazirlar Mahkamasi huzuridagi Din ishlari bo‘yicha qo‘mita raisining o‘rinbosari O‘. Hasanboyev, O‘zbekiston musulmonlari idorasi Ta’lim va kadrlar tayyorlash bo‘limi mudiri v.b. A. Do‘smatov, Buxoro viloyati hokimi O‘. Barnoyev, Buxoro viloyati Adliya boshqarmasi, Buxoro Davlat universiteti hamda boshqa davlat hamda nodavlat tashkilotlar vakillari va talabalarning ota-onalari qatnashdi. Oliy madrasaning tantanali ochilish marosimi ijtimoiy tarmoq orqali onlayn tarzda yoritib borildi.

Tadbir so‘ngida Qur’on tilovat qilindi va davlat ravnaqi, yurt tinchligi va xalq farovonligi, yangi ochilgan oliy madrasa faoliyati borasida duoyi xayrlar qilindi.