Yozgi transfer shunqori “Milan” Rimning “Latsio” klubi sardorini ham sotib oldi

Italiyaning “Latsio” klubi sardori Lukas Bilya faoliyatini “Milan”da davom ettiradi. Bu haqda “rossonerilar” rasmiy sayti xabar berdi.

“Latsio” bilan shartnomasi 2018-yilning yozida yakuniga yetadigan argentinalik futbolchi uni cho‘zishni istamadi. Fursatdan foydalanib qolgan milanliklar esa Bilyani 17 million yevro evaziga sotib oldi. Uning o‘yinlari va “Milan”ga tegadigan foydasi rimliklar hisob raqamini keyinroq yana 3 million yevroga boyitishi mumkin.

“Milan” hamda Lukas Bilya o‘rtasida 3 yillik bitim imzolandi. Yarim himoyachi yangi jamoasida 2020-yil oxiriga qadar to‘p tepadi.

31 yoshli futbolchi A seriyaning yakuniga yetgan mavsumida “Latsio” uchun 34 ta o‘yinda maydonga tushib, 5 ta gol urgan va 4 ta golli uzatmani amalga oshirgandi.