O‘zbekiston Prezidentining 11-iyuldagi qarori bilan Ichki ishlar vazirligi va uning hududiy bo‘linmalari oldiga yo‘l harakati xavfsizligini ta’minlash borasida qator yangi vazifalar qo‘yildi. Bu haqda “Gazeta.uz” xabar bermoqda.
Hujjatda yo‘l harakati xavfsizligi xizmati bo‘linmalari faoliyatini tashkil etishni yangi sifat bosqichiga ko‘tarish, jumladan, asosiy vazifa va funsiyalarni aniq belgilash, rahbarlar va xodimlarning shaxsiy javobgarligini o‘rnatish ko‘zda tutilmoqda.
Yo‘l harakati qoidalarining buzilishi profilaktikasi tizimi qayta ko‘rib chiqilishi va takomillashtirilishi kutilmoqda. YTH va yo‘l tirbandligini bartaraf qilish bo‘yicha ishlar sabab va shartlarni kompleks tahlil qilish yo‘li bilan amalga oshirilishi belgilandi.
Bundan tashqari, yo‘l harakatini nazorat qilishning avtomatlashtirilgan tizimini, videokuzatuv va yo‘l harakati qoidalari buzilishini qayd etish tizimini, shuningdek, boshqa texnik vositalarni, birinchi galda viloyat markazlarida kengaytirish, nazoratning yuqori samaradorligini, qoidabuzarliklarni o‘z vaqtida aniqlash va bartaraf qilishni ta’minlash rejalashtirilmoqda.
Yo‘llarni sifatli saqlash va ularni yo‘l belgilari bilan ta’minlash talablariga qat’iy rioya etilishi ta’minlanadi.
Shuningdek, fuqarolar orasida yo‘l harakati ishtirokchilari tomonidan yo‘l harakati qoidalariga rioya etish madaniyatini oshirishga qaratilgan tushuntirish ishlarini olib borish, shu jumladan, aholi orasida targ‘ibot va tashviqot olib borish yo‘llarini kengaytirish va takomillashtirish ko‘zda tutilmoqda.
Hujjatda belgilangan yana bir yo‘nalish — yo‘l harakati ishtirokchilari haq-huquqlariga rioya etilishini, ularning g‘ururi va nafsoniyati hurmat qilinishini, xizmat chog‘ida muloqot madaniyati va etikaga qat’iy rioya etilishini ta’minlash.
“O‘zavtoyo‘lbelgi” davlat unitar korxonasining tuzilishi ma’qullandi. Uning muassisi — avtomobil yo‘llari bo‘yicha davlat qo‘mitasi. Unitar korxonaning asosiy vazifasi yo‘l belgilari, axborot ko‘rsatkichlari hamda yo‘l harakatini boshqarishning boshqa texnik vositalarini standartlashtirish bo‘yicha normativ hujjatlarga muvofiq ishlab chiqarish bo‘ladi.
Yo‘l belgilarini bosqichma-bosqich yuqori intensivlikdagi (nur qaytaruvchi) zamonaviy muqobillari bilan almashtirish rejalashtirilmoqda. Shuningdek, yo‘l chiziqlarining ekspluatatsiya muddatini uzaytiruvchi maxsus texnika va uskunalar xarid qilinishi ko‘rsatilmoqda.
Uch oy muxlat ichida yo‘l harakati sohasidagi standartlashtirish normativ hujjatlari yangilanadi. Ularda respublika va xalqaro ahamiyatga molik yo‘llar 900 millimetrli, boshqa yo‘llar uchun 700 millimetrli metall korpusli yuqori intensivlikdagi yo‘l belgilari ishlab chiqarilishi, shuningdek, ularni yaxshi ko‘rinishni ta’minlaydigan konstruksiyalarga mustahkamlanishi inobatga olinadi.
Mamlakatda yo‘l harakati xavfsizligini boshqarishning yagona markazlashtirilgan axborot-kompyuter tizimi tashkil etiladi. Bunda Toshkent shahridagi mavjud tizim kengaytiriladi, shuningdek, Nukusda va viloyat markazlarida ushbu tizim joriy etiladi.
Yo‘l-patrul xizmati statsionar postlarining optimizatsiya qilinishi va bosqichma-bosqich rekonstruksiyadan chiqarilishi, avtomobil harakati nazoratiini amalga oshirishni takomillashtirish uchun modernizatsiya qilish va moddiy-texnik bazasini yaxshilash belgilandi.
Yo‘l-patrul xizmatining avtomobil texnikasi va maxsus uskunalari uzluksiz yangilanishi uchun har yili 55 avtotransport vositasi, 600 tayoqcha, 500 radiostansiya va boshqa vositalar sotib olinadi.
Tajriba sifatida Toshkentda, Samarqand va Xorazm viloyatlarida yo‘l-patrul xizmatining mototsikldagi guruhlari tashkil etiladi. Ularning zimmasiga yo‘l va ko‘chalarning o‘tish qiyin qismlarida, odamlar to‘plangan joylarda yo‘l harakati xavfsizligini va hamda qoidalarga rioya etilishini ta’minlash, shuningdek, xorijiy va boshqa delegatsiyalarni kuzatib borish vazifasi yuklanadi.
2018–2019-o‘quv yilidan boshlab Ichki ishlar vazirligi akademiyasida “Yo‘l harakati xavfsizligini ta’minlash bo‘yicha xodim” mutaxassisligi bo‘yicha oliy ma’lumotli kadrlarni tayyorlash yo‘lga qo‘yiladi.
Yo‘l-patrul xizmatining avtotransport vositalari bosqichma-bosqich audio va videofiksatsiya uskunalari bilan ta’minlanadi, bunda YPX xodimlari mobil kameralar bilan ta’minlanadi.
2018-yil 1-yanvaridan joriy etiladigan elektron tizim yo‘l harakati bo‘yicha ma’muriy ishlarning ko‘rib chiqilishini, tegishli notarial harakatlarning ro‘yxatga olinishini, avtotransport vositalarini texnik ko‘rikdan o‘tkazilishini nazorat qilishni, yo‘l harakati xavfsizligi xizmati bo‘linmalari tomonidan davlat xizmatlarining ko‘rsatilishini osonlashtirishi kutilmoqda.
Qo‘shimcha tarzda avtotransport vositalari haydovchilarini tayyorlash va qayta tayyorlash tizimini takomillashtirish rejalashtirilmoqda.
Izoh (0)