Meksikada noma’lum shaxs bar tashrifchilarini o‘qqa tutdi, olti kishi halok bo‘ldi

Meksika shimolidagi Chiuaua shtati Kuatemok shahridagi barda qurolli hujum sodir etildi. Bu haqda, hudud bosh prokuraturasiga tayanib, “TASS” xabar bermoqda.

AK-47 avtomati bilan qurollangan noma’lum jinoyatchining hujumi oqibatida olti kishi halok bo‘lgan, yana 22 kishi jarohat olgan. Jabrlanuvchilar shifoxonalarga yetkazilgan.

Shtat rasmiylari hodisaga ikki raqobatchi jinoiy guruh o‘rtasidagi mojaro sabab bo‘lganligini taxmin qilmoqda. Hujum ortida kim turganligi hozircha noma’lum.

Chiuauada joriy yil boshidan buyon 700 dan ortiq qasddan sodir etilgan qotillik qayd etilgan, bu 2016-yilning shu davriga nisbatan ancha yuqori ko‘rsatkichdir.