“Lokomotiv”ni O‘zbekiston chempioni qilgan mutaxassis B litsenziyasi uchun o‘qishni boshladi

Toshkentning “Lokomotiv” futbol klubini Osiyo Chempionlar ligasida chorak finalga qadar boshlab borishda, keyinroq O‘zbekiston chempioni qilishda va mamlakat kubogini olib berishda katta hissa qo‘shgan avstraliyalik mutaxassis Mirko Yelichich murabbiylarning B litsenziyasi uchun o‘qishni boshladi. Bu haqda “Championat.asia” nashri ma’lumot berdi.

Toshkentda o‘tayotgan o‘quv kurslariga Islom Ahmedov boshchilik qilayotgani O‘FFning Twitter’dagi sahifasida aks etgan.

Qiziq tomoni shundaki, B litsenziyasi uchun Mirko Yelichichning shogirdlari hisoblangan Server Jeparov hamda Timur Kapadze ham bir vaqtda tahsil olmoqda.

Ma’lumot uchun, bolalarga ustozlik qilish uchun murabbiylar avvaliga C litsenziyasi uchun tahsil oladi. Keyingi pog‘ona B, undan keyingisi esa A litsenziyasi. Oliy liga klublariga ustozlik qilish uchun murabbiylarda faqatgina Pro litsenziyasi bo‘lishi shart.