Namangan viloyati Uychi tumanida Prezidentning 2017-yil 29-martdagi “O‘zbekiston Respublikasida birlamchi tibbiy-sanitariya yordami muassasalari faoliyatini tashkil etishni yanada takomillashtirish chora-tadbirlari to‘g‘risida”gi qarori ijrosi borasidagi tajribalarni ommalashtirish masalasiga bag‘ishlangan ko‘rgazmali seminar o‘tkazildi. Bu haqda O‘zA xabar bermoqda.
Viloyat sog‘liqni saqlash boshqarmasi, Uychi tumani hokimligi hamkorligida tashkil etgan tadbirda barcha tuman tibbiyot birlashmalari rahbarlari, yangi tashkil etilgan qishloq oilaviy poliklinikalari mudirlari, hamshiralar, birlamchi tibbiy-sanitariya yordami koordinatorlari, viloyat davolash-profilaktika muassasalari rahbarlari ishtirok etdi.
Ishtirokchilar Uychi tumani tibbiyot birlashmasi tizimida amalga oshirilayotgan ishlar bilan tanishdi. Tumanda qishloq vrachlik punktlarini maqbullashtirish jarayoni yakunlandi. 17 qishloq vrachlik punktining yuridik maqomi bekor qilinib, ular negizida yetti qishloq oilaviy poliklinikasi tashkil etildi. Qisqartirilmagan to‘rt qishloq vrachlik punkti ham tuman tibbiyot birlashmasi tarkibida faoliyat ko‘rsatadigan bo‘ldi. Ayni paytda mazkur birlamchi tibbiy-sanitariya yordami muassasalarini shakllantirish bosqichidagi tashkiliy ishlar yakunlanib, ularning samarali xizmat ko‘rsatishini ta’minlash choralari ko‘rilmoqda.
Tibbiyot birlashmasi tizimidagi 33-qishloq oilaviy poliklinikasi avvalgi “Mevazor” va “G‘ayrat” qishloq vrachlik punktlari negizida tashkil etildi. Endi u hududdagi 16 ming aholiga tibbiy xizmat ko‘rsatadi. Sobiq qishloq vrachlik punkti binosi ta’mirlanib, malakali xizmat ko‘rsatish uchun belgilangan tartibda tibbiy asbob-uskuna, anjomlar bilan jihozlandi, personal tajribali shifokor va o‘rta tibbiyot xodimlari bilan mustahkamlandi.
Seminarda qishloq oilaviy poliklinikalarini tashkil etishdan ko‘zda tutilgan maqsad, mazkur tuzilmaning vazifasi va boshqa tashkiliy jihatlari haqida fikr almashildi.
Izoh (0)