Rossiyaning hukmron partiyasi vakili Barnaulga Putinberg nomini berishni taklif qildi

Rossiyaning hukmron partiyasi — “Yedinaya Rossiya” praymeriz ishtirokchisi Marina Chauzova Barnaul shahri dumasi saylovi arafasidagi tashabbus sifatida shaharni Putinberg yoki Putingrad deb nomlash taklifini ilgari surdi. Uning chiqishi aks etgan videorolik siyosiy texnolog Konstantin Malishev tomonidan Facebook’ka joylashtirildi, deb xabar beradi “Afisha Daily”.

“Bizda Rossiyaning o‘zgarmas yetakchisi bor. U nafaqat Rossiya, balki butun dunyoning yetakchisidir”, — dedi Chauzova hamda “tahlil o‘tkazib”, Rossiya qanday qilib “tizzalaridan ko‘tarilganini” ko‘rishni taklif qildi.

Boshlovchi ushbu taklifning kommunal xo‘jalikka qanday aloqasi borligi bilan qiziqib ko‘rganida Chauzova shahar qayta nomlanishi bilan “barchasi darrov samarador ishlay boshlashi”ni ta’kidladi.

Marina Chauzova uch hafta muqaddam nomzod sifatida ro‘yxatdan o‘tgan va partiya tashkiliy qo‘mitasini “bu safar barchasi jiddiy bo‘lishi”ga ishontirgan edi.

https://www.instagram.com/p/BTTl7VcFcC0/