Milliy matbuot markazida O‘zbekiston Respublikasi Davlat test markazi tomonidan xorijiy davlatlarda ta’lim olganlik to‘g‘risidagi hujjatlarni tan olish va nostrifikatsiyalash (ekvivalentligini qayd etish) hamda nodavlat ta’lim muassasalari faoliyatini litsenziyalash amaliyoti, tajriba va natijalariga bag‘ishlangan matbuot anjumani o‘tkazildi, deb xabar berdi O‘zA.
Prezident Shavkat Mirziyoyevning 2017-yil 20-apreldagi “Oliy ta’lim tizimini yanada rivojlantirish chora-tadbirlari to‘g‘risida”gi qarori bu boradagi ishlarni yangi bosqichga ko‘tarishda muhim dasturilamal bo‘lmoqda.
O‘zbekiston yoshlari orasida xorijda ta’lim olayotganlar safi kengayib bormoqda. Ularning O‘zbekistonga qaytib kelib, ishga joylashishida belgilangan ma’lum tartiblarga qo‘shimcha yangi me’yor va qulayliklar kiritildi.
Bu O‘zbekiston Respublikasi Vazirlar Mahkamasining 2017-yil 3-apreldagi “Xorijiy davlatlarda ta’lim olganlik to‘g‘risidagi hujjatlarni tan olish va nostrifikatsiyalash (ekvivalentligini qayd etish) tartibi to‘g‘risida Nizomga o‘zgartirish va qo‘shimchalar kiritish haqida”gi qarori asosida amalga oshiriladi. Nizomga kiritilgan o‘zgartish va qo‘shimchalarga muvofiq, xalqaro tan olingan tashkilotlarning oliy ta’lim muassasalari reytingi asosida ro‘yxatga kiritilgan oliy o‘quv dargohlarini tamomlagan yurtdoshlarimiz maxsus sinovlar topshirmaydi. Ya’ni ular ortiqcha ovoragarchiliklarsiz mutaxassisligi bo‘yicha ishga bemalol joylashishi mumkin. Mazkur xalqaro reyting bo‘yicha ro‘yxatga kiritilmagan oliy ta’lim muassasalarini bitirganlarga bu imkoniyat berilmaydi. Bundan tashqari, nizomda umumiy o‘rta va o‘rta maxsus ta’lim to‘g‘risidagi hujjatlarni tan olish bo‘yicha ham yangi tartiblar belgilangan.O‘zbekiston Respublikasi Vazirlar Mahkamasining 2017-yil 3-apreldagi qaroriga asosan xorijiy davlatlarda ta’lim olganlik to‘g‘risidagi hujjatlarni nostrifikatsiyalash to‘g‘ridan-to‘g‘ri (maxsus sinovlarsiz) amalga oshiriladigan holatlar kengaytirilgan edi.Davlat test markazi bo‘lim boshlig‘i N.Eshonqulov
Izoh (0)