“Real” — “Barselona” o‘yiniga qadar ham Pike hamda Ramos o‘rtasidagi aytishuvlar davom etib kelayotgandi. Mundo Deportivo nashri hakamlarning adashishlari “Real” foydasiga, “Barselona”ning esa zarariga ishlayotgani haqidagi faktlarni qalashtirib tashlagach, bu holat yanada avj oldi.
Har ikki futolchi La liga 33-turidagi “El-Klasiko”da to‘qnash keldi. “Barselona”ning 3:2 hisobidagi g‘alabasi bilan yakuniga yetgan o‘yinning 77-daqiqasida bosh hakam Serxio Ramosga to‘g‘ridan-to‘g‘ri qizil kartochka ko‘rsatdi.
Maydondan chiqib ketayotganida Ramos bir nimalarga ishora qildi va oxirida qarsak ham chalib qo‘ydi. “Sports.ru”ning oydinlik kiritishicha, bu bilan Ramos raqibi Pikega kamroq gapirishni uqtirmoqchi bo‘lgan.
Ma’lumot uchun, “El-Klasiko”dagi qizilga qadar Ramos 77 daqiqa davomida biror marta ham raqibdan to‘pni muvaffaqiyatli olib qo‘ya olmagan va to‘pni egallab turishni qoyil qilmagan. Bu ham “Sports.ru” keltirgan ma’lumotdir.
Biz faqat hakamlik haqida gapiradigan “Barselona” emasmiz. Qizil — noto‘g‘ri qaror edi, biroq biz unga hurmat bilan munosabatda bo‘lamiz.Serxio Ramos, “Real Madrid” a’zosi
“Barselona” himoyachisi Pike esa shu fikrlarning aksini aytdi.
Bu haqiqiy qizil kartochka — u raqibiga har ikkala oyog‘i bilan tashlandi. Shunchaki ular o‘z foydalariga ishlashi mumkin bo‘lgan qarorlarga o‘rganib qolishgan, bu safar esa unday bo‘lmadi.Xerard Pike, “Barselona” a’zosi
Ramos Pikening shu fikrlariga qarama-qarshi “PSJ”ga qarshi javob o‘yinini eslab o‘tdi.
Pike bilan hech qanday muammoimiz yo‘q. Biroq hozir mendan uni quchib qo‘yishni so‘ramang. Pikening aytishicha, “Real” o‘ziga yon bosiladigan hakamlikka o‘rganib qolgan. Aslida shunday hakamlikni biz “PSJ”ga qarshi uchrashuvda ko‘rgandik.Serxio Ramos, “Real Madrid” a’zosi
Shuningdek, “Real” yetakchisi maydonni tark etar chog‘ida nima sababdan qarsak chalgani va Messiga jarohat yetkazish niyatida emasligi haqida ham aytdi.
Men kech qoldim. Biroq bunda raqibga jarohat yetkazish niyatim yo‘q edi. Mening tushunchamga ko‘ra, bu qizil emas, balki sariq kartochka.Chetlatishdan keyingi qarsagim hakamga emas, Pikega edi. “Barselona”da futbolni boshqacha tushunishadi va doim hakamlar mavzusi ko‘tariladi. Biz esa hakamlikni gapirmaymiz, bu bizning uslub. Pikening muammolari doim hakamlar bilan. Xullas, men qandaydir bo‘lmag‘ur narsalarga bosh qotirishni istamayman, oldinda bizni shundoq ham og‘ir taqvim kutib turibdi.
Izoh (0)