12-fevral, yakshanba kuni Londonda Britaniya kino va televideniye akademiyasining (BAFTA) mukofotlarni topshirish marosimi bo‘lib o‘tdi. Unda “La-La Lend” myuzikli beshta yo‘nalish bo‘yicha sovrinni qo‘lga kiritdi, deb yozadi TJournal.
“La-La Lend” yaratuvchilariga eng yaxshi film, saundtrek va operator ishi uchun haykalchalar taqdim etildi. Mukofotning asosiy ramzi — niqob myuzikl rejissori Demien Shazellga topshirildi. Emma Stoun “eng yaxshi aktrisa” yo‘nalishida g‘oliblikni qo‘lga kiritdi.
Myuzikldan tashqari, “Sher”, “Dengiz bo‘yidagi Manchester”, “Men, Daniyel Bleyk”, “Tashrif”, “Uy” kabi filmlar ham turli yo‘nalishlar bo‘yicha mukofotlandi.
Avvalroq “La-La Lend” Shazellga eng yaxshi rejissorlik ishi yo‘nalishi bo‘yicha “Oltin globus” mukofotini taqdim etgan edi. Myuzikl yettita “Oltin globus”ni qo‘lga kiritib, mukofot rekordini o‘rnatdi.
Shuningdek, “La-La Lend” “Oskar”ga nomzod bo‘lish bo‘yicha rekord qo‘ygan — film 13 yo‘nalishda 14 marta g‘oliblikka da’vogar sifatida ko‘rsatilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)