Markaziy saylov komissiyasi raisi Prezident saylovini yoritish uchun O‘zbekistonga kelgan Rossiya OAV vakillari bilan uchrashdi
Markaziy saylov komissiyasi raisi M.Abdusalomov 28-noyabr, dushanba kuni O‘zbekiston Respublikasi Prezidenti saylovini yoritish bo‘yicha Respublika matbuot markazida saylovni yoritish uchun mamlakatga kelgan Rossiyaning yetakchi ommaviy axborot vositalari vakillari bilan uchrashdi. Bu haqda markaz mutasaddilari xabar bermoqda.
MSK raisi jurnalistlarni saylov komissiyalari tomonidan saylovga tayyorgarlik ko‘rish va uni o‘tkazish bo‘yicha asosiy tadbirlar dasturi ijrosi doirasida amalga oshirilayotgan ishlar bilan tanishtirdi.
O‘zbekiston Respublikasi Prezidenti saylovi to‘g‘risidagi qonunchilikka 2015-yil dekabr oyida kiritilgan o‘zgartish va qo‘shimchalar saylov amaliyotini yanada takomillashtirish, fuqarolarning saylovda erkin ishtirok etishi uchun shart-sharoitlarni kengaytirishga, Prezidentlikka nomzodlarga saylovoldi tashviqoti davrida keng va teng imkoniyatlar yaratishga qaratilgan.
Muloqot chog‘ida qayd etilganidek, saylovning ochiqligi va oshkoraligini, jurnalistlarning saylov kampaniyasiga taalluqli axborotlardan keng foydalanishini ta’minlash maqsadida Prezident saylovini yoritish bo‘yicha Respublika matbuot markazi va okrug saylov komissiyalarining matbuot markazlari faoliyat ko‘rsatmoqda. Ular tomonidan bugungi kunga qadar saylov kampaniyasining muhim bosqichlariga bag‘ishlangan qariyb 100 ta matbuot anjumani va brifinglar o‘tkazildi.
Markaziy va okrug saylov komissiyalari tomonidan mahalliy va xorijiy OAVning 1,3 ming nafar vakili akkreditatsiyadan o‘tkazildi. Saylov kampaniyasi e’lon qilinganidan boshlab shu kunga qadar mamlakatva chet el ommaviy axborot vositalarida 15 ming 845 ta material e’lon qilindi.
Uchrashuvda Rossiya OAVlari vakillari o‘zlarini qiziqtirgan savollarga javob oldi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
