Yer yuzidagi yovvoyi hayvonlarning uchdan ikki qismi 2020-yilga kelib yo‘q bo‘lib ketishi taxmin qilindi

Sayyoradagi yovvoyi hayvonlar soni oxirgi yarim asr mobaynida deyarli uchdan ikki qismga qisqardi. Bu haqda Yovvoyi tabiat fondi (WWF) va London zoologiya uyushmasining 27-oktabr, payshanba kuni chop etilgan hisobotida ma’lum qilindi, deya xabar beradi “Interfaks”.

Hisobotda Yer yuzida dinozavrlar yo‘qolganidan beri umurtqalilarning bu tarzda ommaviy qirilishi birinchi marta kuzatilayotgani bildirilgan. Tadqiqotlar jonzotlar populyatsiyasi ayniqsa 1970—2012-yillarda keskin ravishda qisqarganini ko‘rsatdi. Shundan so‘ng sur’atlar biroz pasaydi, biroq olimlar 2020-yilga kelib baribir barcha hayvonlarning 67 foizi yo‘q bo‘lib ketishini taxmin qilmoqda.

Tadqiqotchilarga ko‘ra, mazkur raqamlar tabiiy ko‘rsatkichlardan yuz marotabadan ko‘proq oshiq. Bunga inson faoliyati — ov, o‘rmonlar kesilishi, atrof-muhit ifloslanishi va global isish sabab ekanligi ta’kidlanmoqda.