Dunyoning eng rahmdil insonlari Ekvadorda yashashi aniqlandi

Psixologlar 70 ga yaqin mamlakat aholisining mentalitetini o‘rganib chiqib, eng rahmdil va hissiyotga beriluvchan odamlar Ekvadorda, Saudiya Arabistonida, Peru va Daniyada yashashini aniqladi. Polsha, Litva, Estoniya va Bolgariya aholisi esa qo‘rs deb topildi. Journal of Cross-Cultural Psychology jurnalida chop etilgan maqolaning mazmunini “RIA Novosti” keltirdi.

Ist-Lensingdagi (AQSh) Michigan universiteti xodimi Uilyam Chopikning ma’lum qilishicha, tadqiqot natijalari faqat hozirgi paytni aks ettiradi, negaki vaqt o‘tishi bilan his-tuyg‘ular shakli va darajasi turli mamlakatlarda o‘zgarib boradi. Bu ayniqsa kuchli migratsiyaga duchor mamlakatlar, jumladan, AQShga xosdir.

So‘rovda jami 100 ming kishi ishtirok etdi. Olimlar bu insonlarning nafaqat o‘z his-tuyg‘ulari, balki ular boshqa xalqlar haqida nima deb o‘ylashi bilan ham qiziqib ko‘rdi. Bundan tashqari, dunyoning bir chetida sodir bo‘lgan voqea boshqa hudud aholisining his-tuyg‘ulariga qanday ta’sir o‘tkazishi ham tadqiqotda aks etdi.

AQSh joriy reytingda yettinchi o‘rinni egalladi. Lotin Amerikasining ikkita, Fors ko‘rfazining uchta mamlakati va Daniyada bu ko‘rsatkich bo‘yicha AQShdan ustun turishi aniqlandi.