Argentina futzalda jahon chempioniga aylandi, Portugaliya esa bronza uchun bellashuvda Erondan yengildi (video)

Kolumbiya mezbonlik qilgan futzal bo‘yicha Jahon Chempionati bellashuvlari o‘z yakuniga yetdi.

Mundial finalida Rossiya va Argentina terma jamoalari o‘zaro to‘qnash keldi. Jahon chempionligi nasib qilmagan yurt termalari ishtirokidagi o‘yinda argentinalik futzalchilar 5:4 hisobida zafar quchib, bosh sovrinni qo‘lga kiritdi.

Argentina terma jamoasi o‘z guruhida Kosta-Rika, Qozog‘iston va Solomon orollarini ortda qoldirib birinchi bo‘lgandi. Keyinroq esa Ukraina, Misr, Portugaliya termalariga chiqish eshiklari ko‘rsatib qo‘yildi.

Jahon Chempionatining 3-o‘rin uchun kechgan bellashuvida Eron va Portugaliya terma jamoalari 2:2 hisobida durang o‘ynadi. Penaltilar seriyasida 4:3 hisobida ustun kelgan forslar turnirni kuchli uchlikda yakunladi. Osiyo chempioni hisoblangan Eron bunga qadar Braziliya va Paragvayni mag‘lub etgan bo‘lsa, yarim finalda Rossiyadan 3:4 hisobida yengilgandi.