Amerika OAVlari FQB uchun kim va qanchaga iPhone maxfiy kodini buzib berganligini aniqlashga urinmoqda
AQShning bir nechta yirik OAVlari Vashingtonda FQBga qarshi da’vo kiritdi. Ular bahorda aynan kim va qancha to‘lov evaziga boshqarmaga ekstremist Said Rizvon Faruqning iPhone smartfonini buzib, ma’lumotlarini olishga yordam berganligini bilishni istamoqda. Bu haqda “TASS” xabar berdi.
Ekstremist 2015-yilning dekabrida San-Bernardinoda (Kaliforniya shtati) otishma uyushtirgan edi.
FQB mazkur hodisani surishtirish davomida telefon qurilmasi ma’lumotlarini qo‘lga kiritishga shunchalik katta e’tibor qaratgan ediki, hatto sud orqali Apple kompaniyasini tergov bilan hamkorlik qilishga majburlashga uringan edi.
Biroq keyinroq ishlab chiqaruvchining yordamiga zarurat bo‘lmadi. Qandaydir pudratchi FQBga iPhone’ning maxfiy kodini buzishga yordam berishini ma’lum qilgan va AQSh OAVlari turli manbalarida ta’kidlanishicha, buning uchun 1 million dollardan kamroq haq olgan.
Endilikda AP agentligi, Gannett mediaxoldingi va Weiss Media kompaniyasi axborot erkinligi qonunini asos qilib, ushbu bitim hujjatlari bilan tanishish imkonini qo‘lga kiritishni talab qilmoqda.
