O‘zbekiston Respublikasi Prezidenti saylovini o‘tkazish bo‘yicha saylov okruglarini tashkil etish haqida qaror qabul qilindi

15-sentabr, payshanba kuni O‘zbekiston Respublikasi Markaziy saylov komissiyasi yig‘ilishi bo‘lib o‘tdi. Uni komissiya raisi Mirzo-Ulug‘bek Abdusalomov olib bordi. Bu haqda Markaziy saylov komissiyasi matbuot xizmati “Daryo”ga xabar berdi.

Yig‘ilishda shu yil dekabr oyida bo‘lib o‘tadigan O‘zbekiston Respublikasi Prezidenti sayloviga asosiy tadbirlar dasturiga muvofiq jiddiy tayyorgarlik ko‘rilayotgani ta’kidlandi. 

“O‘zbekiston Respublikasi Prezidenti saylovi to‘g‘risida”gi qonunning 9 va 14-moddalariga binoan O‘zbekiston Respublikasi Prezidenti saylovini o‘tkazish bo‘yicha saylov okruglarini tashkil etish haqida qaror qabul qilindi. Saylov okruglari Qoraqalpog‘iston Respublikasi, viloyatlar va Toshkent shahrida tuziladi. Saylovchilar soni va okrug saylov komissiyalari manzili ko‘rsatilgan saylov okruglari ro‘yxati OAVda e’lon qilinadi. 

Yig‘ilishda O‘zbekiston Respublikasi Prezidenti sayloviga tayyorgarlik ko‘rish va uni o‘tkazishga tegishli boshqa masalalar ham ko‘rib chiqildi.