“Poyedem, Poyedim!” ko‘rsatuvining yana bir soni O‘zbekistonda suratga olinadi

2016-yilgi Toshkent xalqaro sayyohlik yarmarkasi doirasida “Poyedem, poyedim!” dasturining suratga olish guruhi O‘zbekiston haqida ikkinchi ko‘rsatuvni tasvirga oladi, deya xabar bermoqda “O‘zbekturizm” Milliy kompaniyasi matbuot xizmati.

Bu safar dastur Toshkent va Xorazm vohalariga bag‘ishlanadi. Ko‘rsatuvning O‘zbekistonga bag‘ishlangan birinchi soni Samarqandda olingan va telekanal tomoshabinlarida katta qiziqish uyg‘otgan edi. Shu tufayli yana bir ko‘rsatuvni tasvirga olishga qaror qilishdi.

“Poyedem, Poyedim!” (“Boramiz, tanovul qilamiz”) — “NTV” telekanalining 2012-yil oktabrida start olgan loyihasidir. Dasturga qishloqlar aholisi, ovchilar va baliqchilar, geologlar va oltin izlovchilar, turli millat va xalq vakillari qahramon sifatida tanlab olinadi. Ularning har birida mazali va sog‘lom taomlar retsepti bo‘ladi va ular buni “NTV” tomoshabinlari bilan bo‘lishadi.