Rossiya Federal xavfsizlik xizmati Qrim Respublikasi hududida Ukraina mudofaa vazirligining Razvedka bosh boshqarmasi tomonidan tayyorlangan terrorchilik aktlarining oldi olinganini ma’lum qildi. Bu haqda idoraning matbuot xizmati xabar berdi.
Teraktlarning obyektlari sifatida yarim orol infrastrukturasining eng muhim unsurlari tanlangani aytilmoqda. Diversiyalardan ko‘zlangan maqsad — “federal va mintaqaviy hokimiyat organlariga saylovlarni tayyorlash va o‘tkazish chog‘ida mintaqada ijtimoiy-siyosiy vaziyatni izdan chiqarish”.
Xabarnomada ta’kidlanishicha, o‘tkazilgan tezkor qidiruv tadbirlari natijasida 6-avgustdan 7-avgustga o‘tar kechasi Armyansk shahri yaqinida diversantlar guruhi aniqlandi. Ularni tutish chog‘ida Rossiya xavfsizlik xizmati xodimi halok bo‘ldi. Qurolli to‘qnashuv hududida umumiy quvvati trotil ekvivalentida 40 kilogrammga teng 20 ta qo‘lbola portlovchi uskuna, o‘q-dori, piyodalarga qarshi va magnitli minalar, granatalar hamda Ukraina qurolli kuchlari maxsus bo‘linmalarining qurollanishida bo‘lgan maxsus qurol-yarog‘lar topildi.
Bundan tashqari, xabarnomaga ko‘ra, Qrim yarim orolida o‘rnashgan Ukrainaga sodiq agentlik tarmog‘i yo‘q qilindi. Terrorchilik aktlarini tayyorlashda diversantlarga ko‘mak bergan Ukraina va Rossiya fuqarolari qo‘lga olindi. Asosiy tashkilotchilardan biri sifatida Ukraina razvedkasi xodimi, 1977-yilda tug‘ilgan, Ukrainaning Zaporojye viloyatida istiqomat qiluvchi Panov Yevgeniy Aleksandrovich tilga olinmoqda. Ta’kidlanishicha, ayni paytda o‘z ko‘rsatmalarida u aybini tan olmoqda.
Rossiya maxsus xizmati xabarnomasida uqtirilishicha, 8-avgustga o‘tar kechasi Ukraina mudofaa vazirligiga qarashli maxsus bo‘linmalarining yana ikki diversion guruhi yarim orolga yorib kirishga urindi, ammo bu xatti-harakatlar Rossiya maxsus kuchlari tomonidan bartaraf etildi. Yorib kirishga urinish chog‘ida Ukraina qurolli kuchlari o‘qotar qurol va zirhli texnikadan o‘t ochgani aytilmoqda. Otishma chog‘ida rossiyalik bir harbiy halok bo‘ldi.
Yuqoridagi voqealar yuzasidan jinoiy ish qo‘zg‘atildi. Qo‘shimcha tezkor tadbirlar va tergov harakatlari olib borilmoqda.
Dam olish maskanlarini, shuningdek, hayot ta’minoti va infrastrukturaning eng muhim obyektlarini qo‘riqlash bo‘yicha qo‘shimcha choralar qabul qilindi. Ukraina sarhadlarida chegara rejimi kuchaytirildi.
Izoh (0)