Tailand politsiyasi Twitter’da shahzodaning suratini ulashgan jurnalistning rafiqasini qo‘lga oldi
22-iyul kuni Tailand politsiyasi shotlandiyalik jurnalist Endryu Makgregorning rafiqasini qo‘lga oldi. Bu haqda TJournal xabar bermoqda.
Jurnalist Tailand shahzodasining g‘alati libosda tushgan fotosuratini Twitter orqali ulashgan edi. Uning rafiqasi shu sababdan qo‘lga olingani aytilmoqda. Keyinchalik politsiya vakillari ushbu taxminni tasdiqladi.
Politsiyachilar Makgregorning oilasi turgan uyga bostirib kirib, uning Tailand fuqarosi bo‘lgan rafiqasi hamda uch yoshli o‘g‘li Charlini olib ketgan. Bundan tashqari, uydan kompyuter texnikasi va bir qancha hujjatlar olib chiqib ketilgan.
Reuters’ning sobiq xodimi bo‘lgan Makgregor uzoq vaqtdan beri Bangkokda istiqomat qiladi. O‘z faoliyati davomida u rasmiy hokimiyatni va qirollik oilasini ko‘p bora tanqidga olgan, bu esa mamlakatda jinoyat hisoblanib, 15 yilgacha qamoq bilan jazolanadi. Reuters uning tanqidiy ishlarini chop etishdan bosh tortgach, Makgregor agentlikdan ketib, Tailanddagi korrupsiya va so‘z erkinligining bo‘g‘ilishi haqida kitob yozdi.
Jurnalist va uning rafiqasi Tailanddan 2011-yilda chiqib ketgan, Makgregorga mamlakatga kirish taqiqlangan. Politsiya uning rafiqasi qarindoshlarini ko‘rgani kelganidan foydalanib uni hibsga oldi.
O‘sha paytda Gonkongda komandirovkada bo‘lgan Makgregor bu xabarni eshitib, Facebook’dagi sahifasi orqali rafiqasi uning jurnalistik faoliyatida ishtirok etmaganini hamda uning Tailand hukumatiga nisbatan tanqidiy yondashuviga qo‘shilmasligini ma’lum qildi. Uning rafiqasi ham jurnalist bo‘lib, ilgari Reuters va NBC bilan hamkorlik qilgan.
Makgregorning fikricha, uning ishlari uchun rafiqasini ushlash g‘ayrihuquqiy bo‘lib, Tailand hukumati uning o‘zini ekstraditsiya qilishga urinishi mantiqliroq bo‘lardi.
21-iyul kuni Endryu Makgregor Germaniyaning Bild nashrida chop etilgan fotosuratni Twitter’da ulashdi. Unda Tailandning 63 yoshli shahzodasi Maxi Vachiralongkorn Myunxen aeroportiga oq topikda kelgani tasvirlangan.
Tailand politsiyasi “qirollik oilasini haqorat qiluvchi” surat qalbaki ekanligini uqtirmoqda.
Makgregorning rafiqasini mahkamada to‘rt soat tutib turishdi, so‘ng qo‘yib yuborishdi. Mahalliy matbuotga bergan intervyusida ayol turmush o‘rtog‘idan Tailand hukumatini tanqid qilishni to‘xtatishni so‘rashini ma’lum qildi.
