UzReport UEFA talabiga ko‘ra Yevro—2016 uchrashuvlarini sun’iy yo‘ldosh orqali uzatishni vaqtincha to‘xtatadi

UzReport saytining xabar berishicha, telekanal Yamal 401 sun’iy yo‘ldoshi orqali to‘g‘ridan-to‘g‘ri translyatsiyalarni vaqtincha to‘xtatib turadi.

Xabarda keltirilishicha, bu talab UEFA tomonidan qo‘yilgan. Buning sababini UzReport sun’iy yo‘ldosh signali O‘zbekiston hududidan tashqaridagi qo‘shni davlatlar va boshqa xorijiy mamlakatlar hududlarini ham qamrab olayotganligi bilan izohladi.

“Telekanal texnik xodimlari tez orada geografik cheklov tizimini ishga tushirishi kutilmoqda. Bu cheklov ishga tushganidan so‘ng yurtimizdagi futbol muxlislari Yevro—2016 uchrashuvlarini Yamal 401 sun’iy yo‘ldoshi orqali UzReport TV telekanalida tomosha qilishda davom etishlari mumkin bo‘ladi”, — deyiladi xabarda.

Yamal 401 sun’iy yo‘ldoshi orqali Yevro—2016 turnirini tomosha qilayotganlar o‘yin bo‘lib o‘tgan kunning ertasiga soat 17:00 dan boshlab o‘sha uchrashuvni takror efirda ko‘rishlari mumkin bo‘ladi.