Chili prezidenti o‘zining korrupsiyaga aloqadorligi haqida maqola chop etgan jurnalni sudga berdi

Chili prezidenti Mishel Bachelet Que pasa jurnalini davlat rahbarining korrupsiya mojarosiga aloqadorligi haqidagi maqola tufayli tuhmatda ayblab, sudga berdi. Bu haqda 31-may, seshanba kuni hukumat bosh kotibi Marselo Dias ma’lum qildi, deb yozadi “TASS”.

2014-yil fevralida Chilida mojaro yuzaga keldi, unga Bacheletning qarindoshlari aloqador bo‘lib chiqdi. Muxolifat prezidentning o‘g‘li Sebastyan Davalosni rafiqasi Natalya Kompanyonga tegishli Caval kompaniyasi uchun 10 million dollar kredit olishda o‘z ta’siridan foydalanganlikda aybladi. Shov-shuv tufayli, Chili hukumati huzuridagi ijtimoiy madaniyat boshqarmasi direktori lavozimini egallab turgan Davalos iste’fo berishga majbur bo‘ldi. Shu yilning yanvarida Chili soliq xizmati Kompanyon ustidan da’vo arizasi berdi, u Caval moliyaviy hisobotini soxtalashtirishda ayblanmoqda.

O‘tgan haftada Que pasa saytida Bachelet firibgarlik sxemasiga aloqador bo‘lgani haqida Caval boshqaruvchisiga tayangan holda maqola paydo bo‘ldi. Prezident ayblovlarni rad etdi va maqolani tuhmat deb atadi. Shundan so‘ng jurnal uzr so‘radi va davlat rahbari tilga olingan parchani o‘chirib tashladi.