O‘zbekiston Rossiyaga Ravon R2 avtomobillarini jo‘natishni boshladi

GM Uzbekistan QK Rossiyaga Ravon R2 (Chevrolet Spark muqobili) modeli avtomobillarini jo‘natishni boshladi. Bu haqda, Ravon saytiga asoslanib, “Gazeta.uz” yozmoqda.

Joriy yil oxiriga qadar kompaniya ushbu modeldagi 2500 tacha avtomobil sotishni rejalashtirmoqda.

Mashinalarni muvaffaqiyatli tarzda yetkazib berish va sotishni ta’minlash uchun kompaniya distribyutorlar va dilerlar bilan faol ish olib bormoqda, deyiladi xabarda.

GM Uzbekistan ishlab chiqaradigan keyingi model Nexia sedani bo‘ladi. O‘zbekistonda ular Chevrolet Nexia, eksport bozorlarida esa Ravon Nexia R3 nomi ostida sotiladi.

Ayni paytda, GM Uzbekistan’ning Asakadagi zavodida ikki yangi modelni ishlab chiqarish uchun zarur bo‘lgan barcha ishga tushirish-sozlash va sinov ishlari amalga oshirildi.

GM Uzbekistan Ravon dilerlik tarmoqlarini kengaytirish va Ravon R4 (Cobalt) modelini ishlab chiqish bilan modellar safini yangilash borasidagi ishlarni davom ettirmoqda.

Rossiyada oktabr oyida taqdim etilgan Ravon brendi joriy yilda MDHning boshqa bozorlari, shu jumladan, Qozog‘istonda ham savdoga chiqariladi.