Тошкент шаҳри чорраҳаларида қоидабузарликларни автоматик аниқлашга мўлжалланган камераларнинг ўрнатилиши йўлларда Йўл ҳаракати хафсизлиги бош бошқармаси (ЙҲХББ) назоратчилари сони камайишига сабаб бўлмайди. Бу ҳақда Ўзбекистон ИИВ ЙҲХББ вакили Алишер Сатторов Uzbekistan Today’га маълум қилди.
Тошкент шаҳар Йўл ҳаракати хавфсизлиги бош бошқармасининг шаҳар кўчаларида хизмат қилувчи ходимлари сони билан боғлиқ штат тузилмасига баъзи ўзгартиришлар киритилган бўлиб, бу фақатгина кўчалардаги патрулларнинг бироз қисқаришига дахл қилади.
Ҳозирги вақтда Тошкент шаҳрининг 100 дан ортиқ катта чорраҳалари видеофиксация воситалари билан таъминланган. Ушбу янги технологиялар йўл ҳаракати жараёнида юз берадиган қоидабузарликларни автоматик равишда аниқлаш ва бу ҳақда огоҳлантириш мақсадида татбиқ этилмоқда.
«Биз замонавий, интеллектуал тизим ишлаб чиқяпмиз, уни бошқариш учун юқори малакали мутахассислар зарур. Шу сабабли ҳам шахсий таркибнинг бир қисмини қисқартириш билан, мазкур тизим бошқарувини таъминлайдиган ёш ходимларни жалб этамиз. Умуман олганда, штатни қисқартириш назарда тутилаётгани йўқ», — деди Сатторов.
Унинг сўзларига кўра, ҳозирги кунда Тошкент шаҳрида 400 дан ортиқ тартибга солинадиган чорраҳалар бор. «Ходимларимизда бошқа жойлардаги йўл ҳаракати хавфсизлигини таъминлаш учун иш етарли. Назоратчилар сони аввалгидек қолади, уларнинг иши эса бир неча бор ортади», — дея таъкидлади Сатторов.
Аввалроқ Тошкент шаҳридаги йўллар ва чорраҳаларга ўрнатилган видеофиксация воситалари синов тартибида ишга тушгани ҳақида хабар берилган эди.
Изоҳ (0)