Ishtixondagi pilla kompaniyasi to‘rt yil davomida hisobotlarda tonnalab mahsulotni qo‘shib yozgani aniqlandi

Ishtixon tumanidagi “Ishtixon pilla” kompaniyasi mansabdor shaxslarining noqonuniy harakatlari oqibatida davlat va jamiyat manfaatlariga jiddiy zarar yetkazilgani ma’lum bo‘ldi. Bu haqda “Huquq” gazetasi xabar bermoqda.

Ma’lum bo‘lishicha, kompaniya bosh hisobchisi va direktori o‘zaro til biriktirgan holda, 2010—2014-yillardagi hisobotlarni soxtalashtirishlari oqibatida qasddan 265,44 million so‘m miqdoridagi soliqlarni to‘lashdan bo‘yin tovlagan.

Shuningdek, kompaniya reja ko‘rsatkichlari bajarilmagan bo‘lsa-da, viloyat “Pilla” hududiy birlashmasi va tuman statistika bo‘limiga soxta ma’lumotlar taqdim etgan hamda davlat va jamiyat manfaatlariga jiddiy zarar yetkazgan.

Xususan, 2011-yilda hisobotlarda 45,3 tonna, 2012-yilda 52,9 tonna, 2013-yilda 43,2 tonna, 2014-yilda esa 43 tonna pilla qo‘shib yozilgan.

“Sud aybdorlarga tegishli jazo tayinladi. Shuningdek, ular dastlabki tergov paytida qasddan to‘lanmagan soliq va boshqa majburiy to‘lovlarni to‘liq to‘lab berdi”, — deyiladi gazeta xabarida.