Avval xabar qilinganidek, O‘zbekiston Respublikasi Prezidenti Islom Karimovning taklifiga binoan Yaponiya Bosh vaziri Sindzo Abe 24-oktabr kuni rasmiy tashrif bilan O‘zbekistonga keldi. Tashrifning asosiy voqealari 25-oktabr kuni bo‘lib o‘tdi, deb xabar beradi O‘zA.
Ko‘ksaroy qarorgohida Yaponiya Bosh vazirini rasmiy kutib olish marosimi bo‘ldi. Oliy martabali mehmon sharafiga faxriy qorovul saf tortdi. O‘zbekiston Respublikasi Prezidenti Islom Karimov va Yaponiya Bosh vaziri Sindzo Abe shohsupaga ko‘tarildi. Davlat madhiyalari yangradi. O‘zbekiston va Yaponiya rahbarlari faxriy qorovul safi oldidan o‘tdi.
Islom Karimov va Sindzo Abening tor doiradagi uchrashuvida ikki mamlakat o‘rtasidagi hamkorlikning bugungi holati va uni yanada rivojlantirish istiqbollari muhokama qilindi, dolzarb mintaqaviy va xalqaro masalalar yuzasidan atroflicha fikr almashildi.
Muzokarada siyosiy muloqotlarni izchil davom ettirish, savdo, sanoat, moliya, energetika, fan-ta’lim, madaniyat kabi sohalarda hamkorlikni yanada kengaytirishga kelishib olindi. Xavfsizlik va barqarorlikni mustahkamlash, xalqaro tahdid va xavf-xatarlarga qarshi birgalikda kurashish masalalariga alohida e’tibor qaratildi.
O‘zbekiston ham, Yaponiya ham Afg‘oniston iqtisodiyotini tiklashda faol ishtirok etmoqda. Afg‘onistonda harbiy kuch ishlatish yo‘li bilan tinchlik o‘rnatib bo‘lmasligi, BMT shafeligida qarama-qarshi tomonlar o‘rtasida siyosiy muzokaralar o‘tkazish va ichki kelishuvga erishish eng to‘g‘ri va yagona yo‘l ekanligi uchrashuvda yakdillik bilan ta’kidlandi.
O‘zbekiston va Yaponiya rahbarlari muloqotni ikki mamlakat rasmiy delegatsiyalarining kengaytirilgan tarkibdagi muzokarasida davom ettirdi. Tomonlar savdo-iqtisodiy, investitsiyaviy, moliyaviy-texnikaviy va madaniy-gumanitar sohalardagi hamkorlikni rivojlantirish, o‘zaro savdo aylanmasi hajmini oshirish va nomenklaturasini kengaytirishga oid masalalarni muhokama qildi.
Mushtarak intilishlar samarasida savdo aylanmasi tobora kengayib bormoqda. 2014-yilda o‘zaro tovar ayirboshlash hajmi qariyb 190 million dollarni tashkil etdi. O‘zbekistonda Kunchiqar mamlakatning 12 kompaniyasining vakolatxonasi ochilgan, yaponiyalik ishbilarmonlar bilan hamkorlikda tashkil etilgan o‘n korxona muvaffaqiyatli faoliyat ko‘rsatmoqda.
Oliy darajadagi muloqot chog‘ida ikki mamlakat o‘rtasida barcha sohalarda aloqalarni yanada faollashtirishga oid masalalar yuzasidan fikr almashildi. Foydalanilmayotgan imkoniyatlarni ishga solish, hamkorlik salohiyatini to‘liq yuzaga chiqarish yo‘llari muhokama qilindi.
Muzokaralar yakunida Prezident Islom Karimov va Bosh vazir Sindzo Abe O‘zbekiston va Yaponiya o‘rtasida strategik sheriklikni chuqurlashtirish va kengaytirish to‘g‘risidagi qo‘shma bayonotni imzoladi. Tashqi ishlar vazirliklari va moliya muassasalari o‘rtasida, energetika, ilm-fan, sog‘liqni saqlash sohalaridagi hamkorlikni rivojlantirishga doir qator hujjatlar imzolandi. Energetika va transport tizimini modernizatsiya qilish, mineral-xomashyo resurslarini o‘zlashtirish va qayta ishlash, avtomobilsozlik, neft-gaz va kimyo sanoati, telekommunikatsiya va boshqa zamonaviy sohalarda 8,5 milliard dollardan ortiq qiymatdagi qo‘shma investitsion loyihalarni amalga oshirish bo‘yicha kelishuvlarga erishildi.
“O‘zbekiston va Yaponiya rahbarlari ommaviy axborot vositalari vakillari bilan uchrashuvda muzokaralar amaliy va ishchan ruhda o‘tganini, erishilgan kelishuvlar mamlakatlarimiz hamkorligini yangi mazmun bilan boyitganini ta’kidladilar. Muhokama qilingan barcha masalalar bo‘yicha tomonlarning pozitsiya va qarashlari bir xil yoki yaqin ekani, mamlakatlarimiz o‘zaro hamkorlikni yanada rivojlantirishdan manfaatdorligi qayd etildi.
Kunning ikkinchi yarmida Yaponiya Bosh vaziri Sindzo Abe O‘zbekiston Respublikasi Bosh vaziri Shavkat Mirziyoyev hamrohligida Mustaqillik maydoniga tashrif buyurdi. Oliy martabali mehmon hurriyatimiz, porloq istiqbolimiz va ezgu niyatlarimiz ramzi bo‘lgan Mustaqillik va ezgulik monumenti poyiga gul qo‘ydi. Prezidentimiz Islom Karimov rahnamoligida bu yerda amalga oshirilgan keng ko‘lamli bunyodkorlik va obodonlashtirish ishlariga yuksak baho berdi”, — deyiladi O‘zA xabarida.
Alisher Navoiy nomidagi O‘zbekiston davlat akademik katta teatrining qurilishida Ikkinchi jahon urushi yillarida taqdir taqozosi bilan O‘zbekistonga kelib qolgan yaponiyaliklar ham ishtirok etgan. O‘zbekiston Prezidenti tashabbusi bilan mazkur teatr binosi yaqinda rekonstruksiya qilinib, to‘la ta’mirlandi. O‘zbekiston va Yaponiya Bosh vazirlari yanada chiroy ochgan ushbu koshonaning ochilish marosimida ishtirok etdi.
“Sindzo Abe yapon harbiylari mangu qo‘nim topgan maskanga tashrif buyurdi, ular xotirasiga bag‘ishlab bunyod etilgan yodgorlik poyiga gul qo‘ydi. Yaponiya Bosh vaziri bu joy obod maskanga aylantirilgani, vatandoshlarining xotirasi abadiylashtirilgani uchun Prezidentimizga minnatdorlik bildirdi”, — deyiladi O‘zA xabarida.
Izoh (0)