Asli chernogoriyalik ispan basketbolchisi Yevrobasketda Serbiya bayrog‘ini yirtib tashladi
Ispaniya terma jamoasi sharafini himoya qiluvchi basketbolchi Nikola Mirotich basketbol bo‘yicha Yevropa chempionatida Italiya terma jamoasiga mag‘lub bo‘lganidan so‘ng, Serbiya bayrog‘ini yirtib tashladi. Meduza xabariga ko‘ra, Mirotich o‘yin tugashi bilan tribuna ostidagi inshootga kirib ketarkan, bayroqni parcha-parcha qilib tashlagan.
Oradan bir necha soat o‘tib, kelib chiqishi chernogoriyalik bo‘lgan Mirotich o‘z qilmishi uchun uzr so‘radi. Uning aytishicha, u boshini quyi solgancha ketayotgan bo‘lgan va qo‘liga tushgan narsa aynan Serbiya bayrog‘i ekanligini bilmagan. Basketbolchining qo‘shimcha qilishicha, u hech kimning milliy ramzini tahqirlamoqchi bo‘lmagan.
Nikola Mirotich — basketbol bo‘yicha Yevropa chempionatida qatnashayotgan eng mashhur o‘yinchilardan biridir. U Chernogoriyada tug‘ilgan, biroq Ispaniya terma jamoasida o‘ynaydi. NBAda “Chikago Bullz” jamoasi sharafini himoya qiladi.
Yevrobasketda Ispaniya terma jamoasi Serbiyaga qarshi o‘ynab bo‘ldi va 80:90 hisobida mag‘lubiyatga uchradi. Italiyaga qarshi o‘yinda ham ispanlar mag‘lub bo‘ldi, hisob — 98:105.
Serbiya va Chernogoriya 2006-yilga qadar bir mamlakat bo‘lgan, biroq 2006-yilgi referendumdan so‘ng Chernogoriya parlamenti mustaqillik e’lon qilgan.
