Испания терма жамоаси шарафини ҳимоя қилувчи баскетболчи Никола Миротич баскетбол бўйича Европа чемпионатида Италия терма жамоасига мағлуб бўлганидан сўнг, Сербия байроғини йиртиб ташлади. Meduza хабарига кўра, Миротич ўйин тугаши билан трибуна остидаги иншоотга кириб кетаркан, байроқни парча-парча қилиб ташлаган.
Орадан бир неча соат ўтиб, келиб чиқиши черногориялик бўлган Миротич ўз қилмиши учун узр сўради. Унинг айтишича, у бошини қуйи солганча кетаётган бўлган ва қўлига тушган нарса айнан Сербия байроғи эканлигини билмаган. Баскетболчининг қўшимча қилишича, у ҳеч кимнинг миллий рамзини таҳқирламоқчи бўлмаган.
Никола Миротич — баскетбол бўйича Европа чемпионатида қатнашаётган энг машҳур ўйинчилардан биридир. У Черногорияда туғилган, бироқ Испания терма жамоасида ўйнайди. NBAда «Чикаго Буллз» жамоаси шарафини ҳимоя қилади.
Евробаскетда Испания терма жамоаси Сербияга қарши ўйнаб бўлди ва 80:90 ҳисобида мағлубиятга учради. Италияга қарши ўйинда ҳам испанлар мағлуб бўлди, ҳисоб — 98:105.
Сербия ва Черногория 2006 йилга қадар бир мамлакат бўлган, бироқ 2006 йилги референдумдан сўнг Черногория парламенти мустақиллик эълон қилган.