Skotland-Yard: Litvinenkoni Lugovoy va Kovtun zaharlab o‘ldirgan
Federal xavfsizlik xizmati sobiq ofitseri Aleksandr Litvinenkoni Andrey Lugovoy va Dmitriy Kovtun zaharlagan. Bu haqda suddagi ochiq eshitishlar chog‘ida yakuniy nutq bilan chiqqan Skotland-Yard vakillari ma’lum qildi, deb yozadi “Gazeta.ru”.
“Taxminimizcha, Litvinenko 2006-yil 16-oktabr va 2006-yil 1-noyabrda poloniy-210 bilan zaharlangan. Lugovoy va Kovtun uni zaharlagan”, — dedi politsiya huquqiy maslahatchisi Richard Xorvell. Biroq u bunga Rossiya davlatining aloqasi bor-yo‘qligi haqidagi qarorni sudning o‘ziga havola qildi.
Federal xavfsizlik xizmati va Davlat xavfsizligi qo‘mitasi sobiq ofitseri Aleksandr Litvinenko 2006-yil 23-noyabrda Londonda vafot etgan. Uni ko‘rishga kelgan sobiq hamkasblari Andrey Lugovoy va Dmitriy Kovtun bilan choyxo‘rlik qilgach, Litvinenkoning ahvoli keskin yomonlashgan. O‘limga radioaktiv poloniydan zaharlanish sabab bo‘lgani aniqlangan.
