2015—2016-o‘quv yilida O‘zbekiston OTMlariga yangi talabalarning 67 foizi shartnoma asosida qabul qilinadi
2015-yil 23-iyun kuni O‘zbekiston Respublikasi Prezidenti “2015—2016-o‘quv yilida O‘zbekiston Respublikasining oliy ta’lim muassasalariga qabul to‘g‘risida”gi qarorga imzo chekdi, deb xabar bermoqda “Xushnudbek.uz”.
Prezident qarorida ta’kidlanishicha, aksiyadorlik jamiyatlarida zamonaviy korporativ boshqaruv uslublarini hisobga olib ishlab chiqilgan xizmatchilarning asosiy lavozimlari va ishchilar kasblarining yangilangan klassifikatori tasdiqlanganligi munosabati bilan bakalavr tayyorlashning 7 ta yangi yo‘nalishlari joriy etilgan.
Shuningdek, qarorda oliy ta’lim muassasalariga talabalarni qabul qilish kvotasi belgilab berilgan bo‘lib, unga ko‘ra 2015—2016-o‘quv yilida bakalavr ta’lim yo‘nalishiga 57 907 nafar talaba qabul qilinadi. Shularning 19 120 nafari davlat grantida (33,02 foizi) va 38 787 nafari to‘lov-kontrakt bo‘yicha (66, 98 foizi) tahsil oladi. Agar o‘tgan yilgi kvotalar bilan taqqoslasak, joriy yilgi kvotalar sonida o‘zgarish bo‘lmagan.
Joriy yilda oliy ta’lim muassasalariga 5 000 nafar magistr, shundan 1 548 nafari davlat granti (30,96 foizi), 3 452 nafari esa to‘lov-kontrakt asosida (69,04 foizi) o‘qishga qabul qilinishi belgilangan. Magistratura kvotalarida ham o‘tgan yilgiga qaraganda o‘zgarish kuzatilmagan.
Toshkent kimyo-texnologiya instituti (Qo‘ng‘irot bo‘limi)ning maxsus sirtqi bo‘limiga davlat granti bo‘yicha 65 nafar va Toshkent axborot texnologiyalari universitetining maxsus sirtqi bo‘limiga to‘lov-kontrakt asosida 50 nafar talaba qabul qilinadi (o‘tgan yili 15 nafari davlat granti, 35 nafari shartnoma asosida edi).
Aytib o‘tish joizki, o‘tgan yili hujjat topshirgan abituriyentlar soni bo‘yicha rekord natija qayd etilgan edi. Ya’ni 540 ming nafardan ko‘proq abituriyent talabalik baxtiga musharraf bo‘lish uchun o‘z omadini sinab ko‘rishga ahd qilgan edi. Bu bir o‘rin uchun o‘rtacha 9,4 kishi da’vogarlik qilgan deganidir.
Eslatib o‘tamiz, joriy yildagi qabul jarayonlariga bag‘ishlab, “Daryo” internet-nashri va “Xushnudbek.uz” saytlari hamkorlikda maxsus “Abituriyent—2015” loyihasini tashkil etdi. Bunda qabul komissiyasi faoliyati bilan bog‘liq yangiliklar, ma’lumotlar, bo‘lajak talabalarga maslahat va tushuntirishlar berib boriladi.
