Germaniyalik mutaxassislar o‘zbekistonlik bolalarni tibbiy ko‘rikdan o‘tkazadi

Germaniyaning Friedensdorf International xalqaro tashkiloti mutaxassislari 19-20-iyun kunlari Fondning Toshkentdagi tibbiy-ijtimoiy markazida Farg‘ona, Andijon, Namangan, Toshkent viloyati va Toshkent shahridagi bemor bolalarni tibbiy ko‘rikdan o‘tkazadi. Bu haqda “Sog‘lom avlod uchun” hukumatga qarashli bo‘lmagan xalqaro xayriya fondi matbuot xizmati xabar bermoqda.

Shuningdek Qoraqalpog‘iston Respublikasi, Buxoro, Navoiy va Xorazm (21-iyun kuni – Buxoro shahri viloyat ko‘ptarmoqli bolalar tibbiy markazida), Qashqadaryo va Surxondaryo (22-iyun kuni – Qarshi shahri viloyat ko‘ptarmoqli bolalar tibbiy markazida), Samarqand (23-iyun kuni – Samarqand shahri viloyat ko‘ptarmoqli bolalar tibbiy markazida), Jizzax va Sirdaryo (24-iyun kuni – Jizzax shahri viloyat ko‘ptarmoqli bolalar tibbiy markazida) viloyatlaridagi bemor bolalar ham tibbiy ko‘rikdan o‘tkaziladi.

Tibbiy ko‘rik natijalariga ko‘ra eng og‘ir deb topilgan bemor bolalar avgust oyida Germaniyaning nufuzli klinikalarida davolanish uchun 6 oydan 3 yilgacha bo‘lgan vaqtga jo‘natiladi.