OCh—2015 saralashida Iordaniya U-22 Qirg‘izistonni mag‘lub etdi va O‘zbekistonning taqdiri oxirgi turga qoldi

Iordaniya olimpiya (U-22) terma jamoasi “B” saralash guruhida Qirg‘izistonni yirik hisobda mag‘lub etdi (4:0) va o‘zbekistonliklarning umidini so‘nggi turga qoldirdi, deb xabar bermoqda “Stadion.uz”.

Ikki o‘yin natijasiga ko‘ra, iordaniyaliklar o‘z hisoblaridagi ochkolarni 6 taga yetkazdi. To‘plar nisbati — 9:0. Kuvayt esa bugun Pokiston ustidan 2:0 hisobida zafar quydi va o‘z ochkolarini 4 taga yetkazdi.

So‘nggi turda Iordaniya va Kuvayt jamoalari to‘qnash kelishadi. Kuvaytliklar qit’a chempionatiga chiqishlari uchun 3-turda faqat g‘alaba qozonishlari kerak. Iordaniyaliklarni esa so‘nggi turda hattoki 0:4 hisobidagi mag‘lubiyat ham Osiyo chemponatiga olib chiqadi.

Bizga esa durang yoki Iordaniyaning g‘alabasi kerak. Demak, taqdirimiz Iordaniya qo‘lida. Ular feyr-pleyga amal qilib, Kuvaytga yutqazishmasa, biz Qatarda o‘tadigan OChga boramiz. Aks holda Rio—2016 yo‘llanmasi umidi butunlay so‘nadi.