Toshkentda 80-yillar yulduzlari konsertiga va’da qilingan xonandalarni olib kelmagan tashkilotchi jazolandi

O‘zbekistonda 80-yillar yulduzlari ishtirokidagi “Legendarniy xit-parad” nomli konsert dasturi tashkillashtirilishi ishi yuzasidan hukm e'lon qilindi, deb xabar bermoqda “12news.uz”.

O‘zbekiston Respublikasi Xususiylashtirish, monopoliyadan chiqarish va raqobatni rivojlantirish davlat qo‘mitasining Raqobat, tabiiy monopoliyalar, iste’molchilarning huquqlarini himoya qilish va reklama to‘g‘risidagi qonun hujjatlarini buzishni ko‘rib chiqish bo‘yicha maxsus komissiyasi konsert tashkilotchisi bo‘lgan Meridian Music MChJni qasddan yolg‘on ma’lumot tarqatishda aybdor deb topdi.

Tashkilotchiga iste’molchilar tomonidan chipta xarid qilish uchun sarflangan pullarni qaytarish va konsert haqida reklama joylashtirilgan nashrlarda ushbu holat yuzasidan raddiya chop etish majburiyati yuklandi.

Eslatib o‘tamiz, 27-yanvar kuni Toshkentdagi “Istiqlol” san’at saroyida 80-yillar yulduzlari ishtirokida bo‘lib o‘tishi kerak bo‘lgan konsertda faqatgina o‘zbek estradasi vakillari ishtirok etgani xabar berilgan edi. Shouda ishtirok etishi e’lon qilingan Boney-M, Ottawan, “Kombinatsiya” guruhlari, Natalya Gulkina, Alisa Mondan faqatgina Boney-M guruhining bir a’zosi sahnaga chiqqan.