29-mart kuni RU.TV musiqiy telekanalining “Shou v Vegase” dasturida ishtirok etgan Nargiz Zokirova oq-qora tusli atlas matodan tikilgan libosda namoyon bo‘ldi, deya xabar bermoqda “UZ24”.
Shuningdek, qo‘shiqchi sochiga qirq kokil, bo‘yniga ko‘zmunchoq ham taqib chiqqan.
Nargiz Zokirova 1971-yil Toshkentda san’atkorlar oilasida tug‘ilgan. U taniqli opera qo‘shiqchisi, teatr va kino aktyori, O‘zbekiston xalq artisti Karim Zokirovning nabirasi. Nargiz 14 yoshida Yurmaladagi qo‘shiqlar tanlovida qatnashgan. 90-yillarda o‘zbek estradasida ijod qila boshlagan. 1995-yilda AQShga ko‘chib ketgan va oradan 20 yil o‘tib, 42 yoshida Rossiya sahnasida ko‘rinish berdi.
Nargiz Zokirovaga u “Golos” teletanlovi sahnasiga chiqqan ilk daqiqalardan boshlab ko‘pchilik qiziqish bildirdi. Bunga sabab xonandaning tashqi ko‘rinishi, noodatiy imidji, deyish mumkin. U noan’anaviy soch turmagi, bosh va qo‘llarida tatuirovkalar, turli taqinchoqlar bilan mutlaqo “o‘zbekcha” bo‘lmagan ko‘rinishda sahnaga chiqdi.
Izoh (0)