Тошкентда 80 йиллар юлдузлари концертига ваъда қилинган хонандаларни олиб келмаган ташкилотчи жазоланди

Ўзбекистонда 80 йиллар юлдузлари иштирокидаги «Легендарний хит-парад» номли концерт дастури ташкиллаштирилиши иши юзасидан ҳукм эълон қилинди, деб хабар бермоқда «12news.uz».

Ўзбекистон Республикаси Хусусийлаштириш, монополиядан чиқариш ва рақобатни ривожлантириш давлат қўмитасининг Рақобат, табиий монополиялар, истеъмолчиларнинг ҳуқуқларини ҳимоя қилиш ва реклама тўғрисидаги қонун ҳужжатларини бузишни кўриб чиқиш бўйича махсус комиссияси концерт ташкилотчиси бўлган Meridian Music МЧЖни қасддан ёлғон маълумот тарқатишда айбдор деб топди.

Ташкилотчига истеъмолчилар томонидан чипта харид қилиш учун сарфланган пулларни қайтариш ва концерт ҳақида реклама жойлаштирилган нашрларда ушбу ҳолат юзасидан раддия чоп этиш мажбурияти юкланди.

Эслатиб ўтамиз, 27 январь куни Тошкентдаги «Истиқлол» санъат саройида 80 йиллар юлдузлари иштирокида бўлиб ўтиши керак бўлган концертда фақатгина ўзбек эстрадаси вакиллари иштирок этгани хабар берилган эди. Шоуда иштирок этиши эълон қилинган Boney-M, Ottawan, «Комбинация» гуруҳлари, Наталя Гулкина, Алиса Мондан фақатгина Boney-M гуруҳининг бир аъзоси саҳнага чиққан.