Sirdaryolik mutaxassis Bahodir Davlatovni ko‘pchilik yaxshi taniydi va uni yetarli salohiyatga ega murabbiy, deb biladi. Oliy ligada “Mash’al”ni ma’lum muddat boshqargan Bahodir aka keyinchalik “Yangiyer”ni oyoqqa turg‘azishda katta rol o‘ynadi, deb yozadi “Stadion.uz”.
“Interfutbol.uz” yozishicha, bu klub tarqalib ketgani oqibatida Bahodir Boyjonovichning hozir majburiy ta’til o‘tkazishiga to‘g‘ri kelmoqda. Lekin u futboldan chetlanib ketmadi. Aytaylik, futbolimiz atrofidagi voqealarni hamon diqqat bilan kuzatib boryapti. Bahodir aka bilan suhbat jarayonida milliy jamoamizning Osiyo kubogi−2015’dagi ishtirokiga ham to‘xtaldik. Ya’ni avvalo, suhbatdoshimizning bu boradagi fikrlari bilan qiziqdik.
− Osiyo kubogi bellashuvlarini katta qiziqish bilan kuzatdim, − deya gap boshladi Davlatov. − Tabiiyki, milliy jamoamiz ishtirokidagi o‘yinlarni qoldirganim yo‘q. Shundan so‘ng barchasini tahlil qilib chiqdim ham. Ha, hozir murabbiy sifatida biror jamoada faoliyat yuritmayapman. Lekin haligacha bilimlarimni ishga solib, vaziyatlarni tahlil etib boraman. Ming afsuski, musobaqa terma jamoamiz uchun omadsiz yakunlandi. Demoqchimanki, jamoamiz chorak finaldan o‘tishga qodir edi.
− Umuman olganda, terma jamoamizdan qanday natija kutgandingiz?
− Albatta, chempionlikni, loaqal finalga chiqishini. To‘g‘ri, Avstraliyadagi musobaqa Qatar−2011’dan ancha farqlanishi tayin edi. Zero, Osiyoda futbol tobora rivojlanmoqda va shunga yarasha kuchli terma jamoalar safi kengaymoqda. Kutilganidek, OK−2015 bir qator “syurpriz”larni taqdim etdi. Shunday bo‘lsa-da, vakillarimizdan kattaroq natija kutgandim.
− Jamoamizning guruh bosqichidagi o‘yinlariga qanday baho berasiz?
− Menimcha, guruh bahslarini yaxshi o‘tkazdik. Lekin Xitoy termasi bilan uchrashuvda ochiqchasiga xato qildik. G‘alati holat, yigitlarimiz gol urishganidan so‘ng tashabbusni raqibga shunchaki, berib qo‘yishdi. Xitoyliklar kuchiga to‘g‘ri baho berilmadi, chog‘i... Harqalay, futbolchilarimizda umuman ishtiyoq sezilmadi. Xayriyatki, yigitlarimiz Saudiya Arabistoni termasiga qarshi kechgan bahsda mutlaqo o‘zgarishdi. Futbolchilarimiz shu qadar faol bo‘lishdiki, raqib dovdirab qoldi. J. koreyaliklar bilan uchrashuvda ham xuddi shunday harakat kutgandim. Lekin tan olish o‘rinli, bu uchrashuvda vakillarimiz borlarini berib, to‘p surishdi.
− Mutaxassis sifatida bu mag‘lubiyatni qanday izohlaysiz?
− Qaytaraman, chorak finalda jamoamiz yomon o‘yin ko‘rsatgani yo‘q. Ya’ni koreyaliklarga munosib qarshilik ko‘rsatildi. Buni o‘yin 4 ta bo‘limga cho‘zilganidan ham bilsa bo‘ladi. Qisqasi, Mirjalol Qosimov shogirdlari o‘yin bobida raqibdan qolishganlari yo‘q, faqat vaziyatlardan unumli foydalanmaslik pand berdi. Eh, yarim finalga chiqish uchun yaxshigina imkoniyat bor edi, faqat omad yetishmasligi natijasida yutqazib qo‘ydik. Umuman, Janubiy Koreya termasiga qarshi kechgan o‘yindan ko‘nglim to‘ldi. Menimcha, muxlislar ham shunday fikrda bo‘lsalar kerak.
− Ko‘pchilik “Qosimov asosan yoshlarga tayanishi kerak edi”, degan xulosaga keldi. Bunga munosabatingiz qanday?
− Ha, yoshlarga ishonish kerak. Cho‘chimasdan imkoniyat berilaversa, vaqti kelib samarasi ko‘rinadi. Osiyo kubogida boshqa terma jamoalar o‘yinlarini ham diqqat bilan kuzatib, shunga amin bo‘ldimki, iqtidorli yoshlar guruhi yetishib chiqmoqda. Misol uchun, BAA termasini olaylik. Bosh murabbiy yoshlarni bir necha yil davomida tarbiyalab keldi. Qarang, Amirliklar endi qanday o‘yin ko‘rsatishmoqda. Jamoa safida faxriylardan ko‘ra, yoshlar ko‘p. Mirjalol Qosimov ham yoshlarga ishonaversa, albatta, natija chiqadi. Shaxsan men shunday fikrdaman. Albatta, hammaning o‘ziga yarasha qarashi bor. Balki mening fikrlarim boshqalarga ma’qul kelmas, ammo tan olish joiz, futbolimiz kelajagi aynan yoshlarga bog‘liq.
− Osiyo kubogida yorqin o‘yin ko‘rsatgan futbolchilar sifatida kimlarni tilga olasiz?
− Bir qator yoshlar yaxshi o‘ynashdi. O‘z jamoamizdan Sardor Rashidov yaxshi taassurot qoldirdi. U ayniqsa, Saudiya Arabistoni termasi bilan uchrashuvda o‘zini har tomonlama ko‘rsatdi. Bu yigitchada sezilarli o‘sish bor va shu tariqa davom etsa, kelajakda nafaqat terma jamoamiz, balki butun futbolimizning bosh yulduziga aylanishi mumkin. BAA termasi vakili Umar Abdulrahmon ham maqtovga loyiq. Uning texnikasi hayratga soldi. Koreyalik Son Xyon Min esa barchaga tanish. Garchi u bor mahoratini ko‘rsatolmagan bo‘lsada, baribir, ajralib turdi.
Izoh (0)