Seriyalab ishlab chiqariladigan Lada Vesta avtomobilining ilk suratlari internetda paydo bo‘ldi. Bungacha avtomobilning faqat konsept-kar ko‘rinishidagi suratlari omma e’tiboriga havola etilgan edi, deb xabar bermoqda “Kun.uz”.
Xabar berilishicha, suratlar suratlar “IjAvto” zavodida olingan – bu yerda bir necha kun avval VAZning yangi avtomobili dastlabki partiyasi ishlab chiqarilgan edi.
Avtomobil konveyerga tushgunicha ham VAZning yangi avlod avtomobillariga xos XRay uslubini saqlab qolgan – old “chehrasi” X’ni eslatadi, yon tomonlarida esa C-sifat shtampovkalar bor. Old va orqa yoritgichlar esa konseptdagiga nisbatan kamtarona: diodli chiroqlar o‘rniga oddiy lampochkalar o‘rnatilgan.
Club-Vesta portali axborotiga ko‘ra, suratlarda “Norma” pozitsiyasidagi “Vesta” ko‘rsatilgan. Bunday avtomobillar tumanga qarshi faralar, iqlim nazorati, multimedia tizimi, parktronik bilan ta’minlangan.
Qayd etishlaricha, Lada Vesta faqat “IjAvto”da ishlab chiqariladi. Lada Priora’ni almashtirishi kutilayotgan VAZning ushbu yangi sedani Lada B platformasida, Renault-Nissan mutaxassislari bilan hamkorlikda loyihalashtirilgan.
Vesta hajmi 1,6 litrlik uch xil motor bilan ta’minlanadi – eng qimmat “Vesta”ga Renault-Nissan’ning 114 ot kuchiga ega dvigatellari o‘rnatilgan, qolgan ikki modifikatsiyaga VAZning mos ravishda 87 va 106 ot kuchiga ega motorlari qo‘yiladi. Tezlik uzatish ham ikki xil bo‘ladi – besh bosqichli oddiy uzatmalar qutisi va besh bosqichli, Kick down funksiyali uzatmalar qutisi.
Lada Vesta’ni seriyalab ishlab chiqarish 2015-yilning 25-sentabridan boshlanishi kutilmoqda. Yangi modelning narxi, AutoRambler xabariga ko‘ra, 400 ming rubldan kam bo‘lmaydi.
Izoh (0)