Qoraqalpog‘iston Respublikasidagi 166 dan ziyod xonadonda suv ta’minoti yaxshilandi

O‘zbekistonda aholini toza ichimlik suvi bilan ta’minlash bo‘yicha ishlar Qoraqalpog‘iston Respublikasida ham muvaffaqiyatli amalga oshirilmoqda. Bu haqda UzReport axborot agentligi xabar bermoqda.

O‘tgan yilning investitsiyaviy dasturiga muvofiq, bu yerda 77 kilometrdan ortiq vodoprovod ta’mirlandi. 445 kilometrlik masofada ichimlik suvi tizimi o‘rnatildi. 4 ta quduq qazilib, 39 ta zamonaviy suv nasos stansiyasi qurib bitkazildi. Natijada, BMT Taraqqiyot dasturi loyihasi doirasida Shumanay tumanining alohida ovullarida 65 million 240 ming so‘m grant mablag‘i evaziga suv quvurlari o‘tkazilib, mahalliy aholi ichimlik suvi bilan ta’minlandi.

Bundan tashqari, olis hududda joylashgan ovullar aholisini ichimlik suvi bilan ta’minlash maqsadida 735 million so‘mga teng mablag‘ evaziga qayta ta’mirlash ishlari olib borildi. Natijada 166 dan ziyod xonadonda suv ta’minoti yaxshilandi. Ta’kidlash joiz, olib borilgan sa’y-harakatlar 29 ming aholini ichimlik suvi bilan ta’minlash darajasini yaxshilashga xizmat qildi.