Namangan viloyatida olimpiya zaxiralari sport maktabining yangi binosi foydalanishga topshirildi
Namangan viloyati To‘raqo‘rg‘on tumanidagi 28-bolalar va o‘smirlar olimpiya zaxiralari sport maktabining yangi binosi foydalanishga topshirildi. Bu haqda O‘zbekiston Milliy axborot agentligi xabar bermoqda.
Tuman hokimligi, O‘zbekiston Bolalar sportini rivojlantirish jamg‘armasi Namangan viloyati filiali vakillari, ommaviy axborot vositalari xodimlari va keng jamoatchilik ishtirok etgan tadbirda Prezident rahnamoligida aholi, ayniqsa, bolalar o‘rtasida sog‘lom turmush tarzini qaror toptirish maqsadida jismoniy tarbiya va sportni yanada ommalashtirishga ustuvor ahamiyat qaratilayotgani ta’kidlandi.
“Zafar qurilish servis” korxonasi bunyodkorlari tomonidan 2 milliard 38 million so‘mlik qurilish-montaj ishlari bajarilgan zamonaviy maskanda yoshlarning kurash, belbog‘li kurash, yunon-rum kurashi, dzyudo, turon yakka kurashi va og‘ir atletika bilan shug‘ullanishi uchun barcha sharoit yaratilgan.
“Sport maktabining yangi binosi yana yuzlab havaskor yoshlarning professional sportchi darajasiga ko‘tarilishiga xizmat qiladi, – dedi Bolalar sportini rivojlantirish jamg‘armasi To‘raqo‘rg‘on tumani vakili Turdiali Qodirov. – Belbog‘li kurash bo‘yicha uch karra jahon chempioni, xalqaro toifadagi sport ustasi Rustamjon Umarov, xalqaro toifadagi sport ustalari Muzaffar Soyibboyev, Mansur Bahromov, Fayzullo Munisjonov, belbog‘li kurash bo‘yicha jahon chempionlari Abdurasul Habibullayev, Botir Tohirov, Abdulaziz Hamidjonov, Jahongir Abdullayev kabi bugungi kunda mamlakatimizda taniqli sportchilar shu dargohda ilk mahorat saboqlarini olgan”.
