Microsoft kompaniyasi 2014-yilning ikkinchi yarmida taqdim etilishi katta qiziqish bilan kutilayotgan gadjetlar orasidan o‘rin olgan McLaren nomli smartfonini ishlab chiqarayotgan bo‘lishi mumkin. Bu haqda Phonearena.com sayti xabar berdi, deb yozadi “Parol” nashri.
Ushbu smartfon Lumia 1020’ning davomchisi sifatida qaralayotgan edi. Biroq, iyulda Nokia kompaniyasining 18 ming nafar xodimi ishdan bo‘shatilganda, McLaren smartfoni ishlab chiqarilmasligi ham xabar qilingan edi.
Hozirda esa Xitoy auksion saytlaridan birida McLaren smartfonining Nokia RM-1052 nomi ostidagi nusxasi paydo bo‘ldi. Shu bilan birga u Microsoft kompaniyasining mulki va sotuv uchun emas deyilmoqda.
Smartfonning suratlaridan uning kamerasi xuddi Lumia 1020 bilan bir xil ekanligini, unda to‘rt yadroli protsessor, 2 Gb tezkor xotira, 1080×1920 pikselli displey o‘rnatilganini ko‘rish mumkin. Taxmin qilish mumkinki, uning displeyi 5 dyuymli bo‘ladi.
Avvalroq esa, kompaniya McLaren smartfonida 3D Touch funksiyasi mavjud bo‘lishi va buning natijasida uning displeyiga qo‘l tekkizmasdan ishlatilish imkoniyati borligi haqida xabar bergan edi.
Izoh (0)