“MTS” va O‘zbekistonning xalqaro arbitrajdagi bahslari to‘xtatildi

Investitsiya bahslarini hal qilish xalqaro markazi Rossiyaning “Mobilniye TeleSistemi” (“MTS”) kompaniyasi va O‘zbekiston o‘rtasidagi arbitraj muhokamasini tomonlarning birgalikdagi bayonoti bo‘yicha tugatdi, deb xabar bermoqda Gazeta.uz.

Avvalroq, 31-iyul kuni “MTS” kompaniyasi O‘zbekiston hukumati bilan murosa bitimi imzolagani, O‘zbekistonda yangi Universal Mobile Systems (UMS) qo‘shma korxona tashkil etishi, korxonaning 50,01 foizi “MTS”ga, 49,99 foizi esa O‘zbekiston hukumatiga tegishli bo‘lishi haqida xabar bergan edi.

Murosa bitimi ingliz huquqi orqali boshqariladi va tomonlar o‘rtasidagi barcha bahsli holatlarni Parijdagi Xalqaro savdo palatasi huzuridagi Xalqaro arbitrajda ko‘rib chiqishni ko‘zda tutadi.

UMS qo‘shma korxonasiga 2G/3G/LTE tarmoqlari, chastota va raqamlar hajmi bo‘yicha litsenziyalar, shuningdek, investitsiyalar saqlanishi va qaytarilishi bo‘yicha kafolatlar olgan. Yangi operator 1-dekabrdan o‘z tijoriy faoliyatini boshlashi ko‘zda tutilgan.