Toshkent xalqaro aeroportining uchib kelish zallariga o‘rnatilgan zamonaviy teplovizorlar orqali kelayotgan har bir aviayo‘lovchi tibbiy tekshiruvdan o‘tkazilmoqda, deya xabar berdi O‘zA.
Shunday teplovizorlar sayyohlar va tadbirkorlar ko‘p keladigan Buxoro, Samarqand, Urganch va Navoiy shaharlari aeroportlariga ham o‘rnatilgan. Tibbiy tekshiruvlarni o‘tkazishga “O‘zbekiston havo yo‘llari” milliy aviakompaniyasi davlat sanitariya-epidemiologiya nazorati markazining sanitariya-nazorat bo‘limi mutaxassislari bilan bir qatorda Sog‘liqni saqlash vazirligiga qarashli virusologiya va epidemiologiya, mikrobiologiya va yuqumli kasalliklar ilmiy-tadqiqot institutlari klinikalari shifokorlari ham jalb etildi.
Davlat chegaralarini kesib o‘tish joylaridagi sanitariya-nazorat punktlarida mamlakatimiz hududiga kirib kelayotgan fuqarolar zamonaviy pirometrlar (masofadan tana haroratini o‘lchash jihozi) yordamida tekshirilmoqda. Barcha sanitariya-nazorat punktlari mutaxassislari yetarli miqdorda zamonaviy shaxsiy himoya vositalari bilan ta’minlangan.
Agar aviayo‘lovchilar va mamlakatimiz chegaralarini kesib o‘tayotgan fuqarolar orasida kasallikka gumon qilinganlar aniqlansa, sanitariya-nazorat bo‘limi xodimlari, aeroportda navbatchilik qilayotgan mutaxassislar hamda aeroport tibbiy punkti tibbiyot xodimlari bilan birgalikda tegishli chora-tadbirlar amalga oshiriladi.
Virusologiya ilmiy-tadqiqot instituti klinikasida ebola kasalligiga gumon qilinganlarni gospitalizatsiya qilish maqsadida bosimi boshqariladigan maxsus bokslar hozirlangan. Klinikada yetarli miqdorda zarur dori-darmonlar, shaxsiy himoya va zararsizlantiruvchi vositalar zaxirasi tayyorlangan. Viloyat yuqumli kasalliklar shifoxonalarida ham zaxira yaratildi.
2014-yilning oktabr oyidan xorijiy safardan qaytayotgan yurtdoshlarimizning salomatligi yuqumli kasalliklar shifokori bilan kuchaytirilgan tarkib yordamida teplovizorlar vositasida nazorat qilib borilmoqda.
Jahon sog‘liqni saqlash tashkiloti ma’lumotlariga ko‘ra, bugungi kunda Afrikaning Gvineya, Serra-Leone, Liberiya, Kongo Demokratik Respublikasi, Nigeriya va Senegal davlatlarida odamlar orasida o‘ta xavfli virusli, yuqori yuquvchanlikka ega ebola isitmasi kasalligi bo‘yicha epidemiologik vaziyat murakkablashmoqda. Joriy yilning 15-oktabriga qadar to‘qqiz ming nafarga yaqin bemor ro‘yxatga olingan, ularning qariyb yarmi shu kasallikdan vafot etgan.
Izoh (0)