Buyuk Britaniya matbuoti qirolicha Yelizaveta II’ga suiqasd tayyorlanganini xabar berdi

Buyuk Britaniya politsiyasi qirolicha Yelizaveta II’ga suiqasd tayyorlayotgan to‘rt nafar ekstremistni qo‘lga oldi. Bu haqda The Sun nashri xabar berdi.

Nashrning xabar berishicha, terrorchilar Yelizaveta II’ni urushlarda va qurolli mojarolarda halok bo‘lgan Britaniya qirollik legioni a’zolari sharafiga o‘tkazilgan festival doirasidagi tadbirda o‘ldirmoqchi bo‘lgan. Jinoyatchilar qirolichaga Albert-xollda pichoq bilan hujum qilmoqchi bo‘lgan, lekin ularning o‘qotar qurolga ega bo‘lgani ham taxmin qilingan.

Politsiya 19 yoshdan 27 yoshgacha bo‘lgan to‘rt nafar gumondorni bir necha reyd davomida London g‘arbida va Bakingemshir grafligida qo‘lga olgan. Hibsga olinganlar terakt uyushtirmoqchi bo‘lgani haqida Skotlend-Yard hisobotida ma’lum qilingan, biroq ularning qirolichaga suiqasd uyushtirishni rejalashtirgani to‘g‘risida hech nima deyilmagan.