Qozog‘istonning Air Astana milliy aviakompaniyasi O‘zbekiston va Qozog‘iston o‘rtasidagi reyslar miqdorini oshirish taklifini ilgari surdi, deb xabar beradi Uzdaily.uz.
Aviakompaniya prezidentining hukumat, qonunchilik masalalari va xavfsizlik bo‘yicha o‘rinbosari Yerbol Ospanov bergan ma’lumotlarga ko‘ra, Air Astana 29-oktabr, chorshanba kuni O‘zbekiston hukumati bilan hamkorlikni yanada rivojlantirishga qaratilgan muzokaralarni olib boradi.
Muzokaralar davomida Qozog‘iston milliy aviakompaniyasining O‘zbekistonga amalga oshiriladigan reyslar sonini ko‘paytirishni taklif qilishi kutilmoqda. Xususan, Yerbol Ospanovning qayd etishicha, Air Astana Olma-Ota—Toshkent—Olma-Ota yo‘nalishidagi parvozlarni kuniga ikki marotaba (haftasiga 14 reys)gacha, Ostona—Toshkent—Ostona yo‘nalishidagilarni esa kuniga bir marotaba (haftada yetti reys)gacha ko‘paytirishni mo‘ljallamoqda.
Hozirda Air Astana kompaniyasining Olma-Ota—Toshkent—Olma-Ota yo‘nalishidagi reyslari soni haftasiga oltitani, Ostona—Toshkent—Ostona yo‘nalishidagi parvozlari miqdori esa haftasiga ikkitani tashkil etadi.
Air Astana ma’lumotlariga ko‘ra, aviakompaniya 2013-yilda 72,4 ming yo‘lovchini, 2014-yil yanvar—sentabr oylarida esa 54,61 ming kishini Qozog‘istondan Toshkentga keltirgan.
Izoh (0)