Sentabr boshida taqdim etilgan Samsung Galaxy Note 4 smartfoni Toshkent shahridagi “Fleshka” savdo majmuasida sotila boshlandi. Bu haqda Mobinfo.uz ma’lumotiga asoslanib “Parol” nashri xabar berdi.
Ushbu smartfon dizayni Note 3 bilan bir xil, ammo u Galaxy Alpha kabi metal ramkaga ega va uning texnik xususiyatlari ancha yaxshilangan. Galaxy Note 4’ning old kamerasi 120 daraja burchak ostida surat oladi. Shu bois uning yordamida selfi surat olish ancha qulay va uning old kamerasida ham panorama surat olish mumkin.
Unda 5,7 dyuym 2560×1440 pikselli Super AMOLED displey, 3,7 megapikselli old va 16 megapikselli orqa kamera, 3220 mA·soat quvvatga ega batareya, 3 Gb tezkor va MicroSD yordamida kengaytirish mumkin bo‘lgan 32 Gb ichki xotira o‘rnatilgan. Uning to‘rt va sakkiz yadroli protsessorga ega turlari bor.
Yangi gadjetda tezkor quvvatlash funksiyasi mavjud. U bilan ushbu planshetofon batareyasini 50 foizga to‘ldirish uchun 30 daqiqa sarflanadi. Galaxy Note 3’da esa bu ish uchun 55 daqiqa sarflanar edi.
20-oktabr holatiga ko‘ra Galaxy Note 4 planshetofoni “Fleshka” savdo majmuasida 2 780 000 so‘mdan sotilmoqda. Eslatib o‘tamiz, ushbu majmuada ilk iPhone 6 smartfoni 5 550 000 so‘mdan sotilgan edi.
Shuningdek, “Fleshka” savdo majmuasida sotilayotgan barcha Note smartfonlarining narxlari bilan “Parol” nashrining ushbu maqolasida tanishishingiz mumkin. Smartfonning rasman tasdiqlangan suratlarini esa ushbu fotojamlanmada tomosha qilsangiz bo‘ladi.
Izoh (0)