Сентябрь бошида тақдим этилган Samsung Galaxy Note 4 смартфони Тошкент шаҳридаги «Флешка» савдо мажмуасида сотила бошланди. Бу ҳақда Mobinfo.uz маълумотига асосланиб «Пароль» нашри хабар берди.

Ушбу смартфон дизайни Note 3 билан бир хил, аммо у Galaxy Alpha каби метал рамкага эга ва унинг техник хусусиятлари анча яхшиланган. Galaxy Note 4’нинг олд камераси 120 даража бурчак остида сурат олади. Шу боис унинг ёрдамида селфи сурат олиш анча қулай ва унинг олд камерасида ҳам панорама сурат олиш мумкин.

Унда 5,7 дюйм 2560×1440 пикселли Super AMOLED дисплей, 3,7 мегапикселли олд ва 16 мегапикселли орқа камера, 3220 мА·соат қувватга эга батарея, 3 Гб тезкор ва MicroSD ёрдамида кенгайтириш мумкин бўлган 32 Гб ички хотира ўрнатилган. Унинг тўрт ва саккиз ядроли процессорга эга турлари бор. 

Янги гаджетда тезкор қувватлаш функцияси мавжуд. У билан ушбу планшетофон батареясини 50 фоизга тўлдириш учун 30 дақиқа сарфланади. Galaxy Note 3’да эса бу иш учун 55 дақиқа сарфланар эди.

20 октябрь ҳолатига кўра Galaxy Note 4 планшетофони «Флешка» савдо мажмуасида 2 780 000 сўмдан сотилмоқда. Эслатиб ўтамиз, ушбу мажмуада илк iPhone 6 смартфони 5 550 000 сўмдан сотилган эди.

Шунингдек, «Флешка» савдо мажмуасида сотилаётган барча Note смартфонларининг нархлари билан «Пароль» нашрининг ушбу мақоласида танишишингиз мумкин. Смартфоннинг расман тасдиқланган суратларини эса ушбу фотожамланмада томоша қилсангиз бўлади.