Iordaniya matbuoti: “Hozirgi O‘zbekiston termasi avvalgisidan farq qiladi”
4-sentabr kuni Toshkentdagi “Paxtakor” markaziy stadionida O‘zbekiston milliy terma jamoasi Iordaniya termasiga qarshi o‘rtoqlik uchrashuvida maydonga tushadi. Ushbu o‘yin Osiyoning boshqa davlatlarida ham diqqat markazida bo‘lmoqda, deb xabar beradi Uff.uz.
Jumladan, Iordaniyada mazkur o‘yin haqida mamlakat poytaxtida chop etiladigan The Jordan Times, Arab News, The Star kabi nashrlar to‘xtalib o‘tishgan.
“Abu Ismoil Ahmad shogirdlarini Toshkentda muhim o‘rtoqlik uchrashuvi kutmoqda. Bu o‘yin avvalgisidan ancha farq qiladi. Birinchidan, bu o‘rtoqlik maqomidagi o‘yin. Bu safar bosim bo‘lmaydi. Ikkinchidan esa, raqibimiz avvalgidan biroz kuchsizlangan. Bu bilan O‘zbekistonga qarshi o‘yin kerakmas, demoqchi emasmiz. Aksincha, ayni muddao bo‘ladi.
O‘tgan yili Iordaniya O‘zbekiston qarshiligini yenga olgandi. Bu safar ham shunday bo‘lishini taxmin qilish mumkin.
Bu o‘yin orqali Xitoyga qarshi 9-sentabrda kechadigan uchrashuv tarkibi shakllantirilsa hech gapmas. Nima bo‘lganda ham Iordaniya yangi bosqich oldida turibdi.
Jamoa oldida Avstraliyadagi musobaqada kuchli to‘rtlikka kirish vazifasi qo‘yilgan ekan, har bir o‘rtoqlik o‘yinidan maksimal ravishda foydalanish kerak degan fikrdamiz”, — deyiladi nomlari yuqorida tilga olingan nashrlarning sport rukni ostida berilayotgan xabarlarda.
Yuqoridagilardan xulosa qilsak, Iordaniya Toshkentda g‘alaba qozonishni rejalashtirmoqda. Biz ham o‘z navbatida futbolchilarimizdan chiroyli o‘yin kutib qolamiz.
