Ertaga, 1-avgust kuni poytaxt OTMlariga kirish imtihonlari o‘tkazilishi munosabati bilan shahar jamoatchilik transporti faoliyatiga o‘zgartirish kiritiladi. Bu haqda Uz24.uz xabar berdi.

Xususan, metroning Yunusobod yo‘nalishi boshqa kunlarga nisbatan bir soat avval — 5:00 dan qatnay boshlaydi. Chilonzor va O‘zbekiston yo‘nalishlari esa odatdagidek 5:00 da ishlay boshlaydi. Ertalab 6 dan keyin poyezdlar orasidagi interval 2,5 — 3 daqiqani tashkil etadi.

Avtobus, tramvay va yo‘nalishli taksilar ham Toshkent shahar hokimi o‘rinbosari buyrug‘i bilan ertalab 6:00 dan yo‘nalishga chiqadi. So‘nggi bekatga yetib kelgan barcha transport grafikni kutib o‘tirmasdan darhol ortga qaytib ketadi. Ertalabki 7 dan so‘ng, abituriyentlarning katta qismi OTMlar hududiga yetib olgach, shahar transporti yo‘nalishi grafik bo‘yicha tartibga tushadi.

Bundan tashqari, OTMlarga tutash ba’zi ko‘chalarda harakat to‘xtatilishi mumkin. Biroq aynan qaysi ko‘chalar yopib qo‘yilishi hozircha noma’lum.