Janglar xalqaro ekspertlarning “Boing” qulagan joyda ishlashiga xalal bermoqda

Ukraina prezidenti Pyotr Poroshenko Niderlandiya va Avstraliya tashqi ishlar vazirlari bilan Donetsk yaqinida halokatga uchragan Malayziya “Boing”ini tadqiq etish jarayonini muhokama qildi. Tomonlar tergov ishlari maksimal darajada shaffof holatda olib borilishi zarurligini aytdi, deya xabar berdi Euronews.

Avvalroq janglar tufayli xalqaro ekspertlar delegatsiyasi samolyot qulagan joyga ikki marta bora olmagani xabar berilgan edi.

Eslatib o‘tamiz, BMTning inson huquqlari bo‘yicha Oliy komissari Navi Pilley Ukraina osmonida Malayziya avialiniyasi samolyotini urib tushirgan o‘q zarbasi harbiy jinoyat deb baholanishi mumkinligini aytgan edi.

Ukraina qurolli kuchlari “Boing” qulagan hudud yaqinida faol harbiy harakatlar olib borayotgani xabar berilmoqda. Yaqin atrofdagi istiqomatchilar o‘z uylarini tark etmoqda. Xalqaro ekpertlar esa halokat joyiga ikki kundan buyon yetib bora olmayapti. Otishmalar olib borilayotgani, artilleriya snaryadlari portlayotgani tufayli ular yo‘ldan to‘xtagan.